سورة الاعراف - آیت 148

وَاتَّخَذَ قَوْمُ مُوسَىٰ مِن بَعْدِهِ مِنْ حُلِيِّهِمْ عِجْلًا جَسَدًا لَّهُ خُوَارٌ ۚ أَلَمْ يَرَوْا أَنَّهُ لَا يُكَلِّمُهُمْ وَلَا يَهْدِيهِمْ سَبِيلًا ۘ اتَّخَذُوهُ وَكَانُوا ظَالِمِينَ

ترجمہ عبدالسلام بھٹوی - عبدالسلام بن محمد

اور موسیٰ کی قوم نے اس کے بعد اپنے زیوروں سے ایک بچھڑا بنا لیا، جو ایک جسم تھا، جس کی گائے جیسی آواز تھی۔ کیا انھوں نے یہ نہ دیکھا کہ بے شک وہ نہ ان سے بات کرتا ہے اور نہ انھیں کوئی راستہ بتاتا ہے۔ انھوں نے اسے پکڑا اور وہ ظالم تھے۔

تسہیل البیان فی تفسیر القرآن - ام عمران شکیلہ بنت میاں فضل حسین

بنی اسرائیل کا بچھڑے کو پوجنا: حضرت موسیٰ علیہ السلام جب چالیس راتوں کے لیے کوہ طور گئے تو پیچھے سے سامری نامی شخص نے سونے کے زیورات جو فرعونیوں کے پاس یعنی بنی اسرائیل کے پاس رہ گئے تھے، انھیں جمع کیا اور اس کو پگھلا کر ایک بچھڑا بنایا جو اللہ کی قدرت سے گائے کی شکل کا بن گیا تھا اُس میں جبرائیل علیہ السلام کے گھوڑے کے سموں کے نیچے کی مٹی بھی شامل تھی، جو اس نے سنبھال کر رکھی ہوئی تھی، اس میں شامل کردی، جس میں اللہ نے زندگی کی تاثیررکھی تھی، جس کی وجہ سے بچھڑاکچھ کچھ بیل کی آواز نکا لتا تھا (گو واضح کلام کرنے اور راہنمائی کرنے سے عاجز تھا جیسا کہ قرآن کے الفاظ واضح کر رہے ہیں )اس میں اختلاف ہے، کہ وہ فی الواقع گوشت پوست کا بچھڑا بن گیا تھا یا تھا وہ سونے کا ہی لیکن کسی طریقے سے اس میں ہوا داخل ہوتی تو گا ئے، بیل کی سی آواز یں اس میں سے نکلتیں۔ (ابن کثیر: ۲/ ۴۰۱) اس آواز سے سامری نے بنی اسرائیل کو گمراہ کیا کہ تمہارا معبود تو یہ ہے، موسیٰ علیہ السلام بھول گئے ہیں اور وہ معبود کی تلاش میں کوہ طور پر گئے ہیں،بنی اسرائیل کو اتنی سمجھ بھی نہ آئی کہ جو معبو د انہوں نے گھڑ لیا ہے وہ معبود تو کسی بات کا جواب بھی نہیں دے سکتا اور نہ نفع و نقصان کا اختیار رکھتا ہے، تو وہ ان کی راہنمائی کیا کرے گا، اسکے باوجود انھوں نے بچھڑے کو معبود قرار دے دیا تواس سے بڑھ کر بھی کوئی بے انصافی، ظلم و شرک کی بات ہو سکتی ہے۔ رسول اللہ صلی اللہ علیہ وسلم نے سچ فرمایا ہے: ’’کسی چیز کی محبت انسان کو اندھا، بہرہ کر دیتی ہے۔‘‘ (ابوداؤد: ۵۱۳۰)