پیغمبر مساکین : (ف ١) قرآن حکیم میں بعض باتیں بصیغہ امر ادا کی گئی ہیں ، مگر اس سے مراد خبر ہے ، اور ایک واقعہ کا اظہار ہے ، اور اس کی بہت سی مثالیں ہیں یہاں بھی بالکل یہی انداز بیان ہے ، بظاہر معلوم ہوتا ہے کہ حضور (صلی اللہ علیہ وآلہ وسلم) شاید ان عام لوگوں میں اٹھنا بیٹھنا پسند نہ فرماتے تھے جو غریب اور مفلس تھے ، اور قرآن حکیم میں اللہ تعالیٰ نے فرمایا ہے آپ ان لوگوں کے ساتھ رہنے میں کوئی عار محسوس نہ کریں ، حالانکہ واقعہ بالکل اس کے خلاف ہے ، بات یہ ہے کہ حضور (صلی اللہ علیہ وآلہ وسلم) ہمیشہ ابو ذر (رض) ، سلمان فارسی (رض) ، اور اس قسم کے غریب اور مخلص عقیدتمندوں میں بےتکلفی سے بیٹھتے ، اور انہیں صبح وشام وقت گزارتے ، امراء کو یہ ناگوار تھا ، کہ وہ اس حالت میں آپ سے ملیں ، چنانچہ وہ کہتے کہ جناب ہم اس حلقے میں بیٹھ کر آپ سے گفتگو نہیں کرسکتے ، ان کے کپڑوں سے بو آرہی ہے ، اور ہماری طبیعت میں تکدر پیدا ہوتا ہے ، آپ بھی ان سے الگ ہوجائیے ، مگر وہ پیغمبر جو افلاس وفقر کو اعزاز بخشنے کے لئے آیا تھا ، کیونکر ان کی باتوں کو مان لیتا ، قرآن کی زبان میں ان کو بتایا گیا ، کہ گو یہ مفلس ہیں ، مگر دولت ایمان سے ان کے دل مالا مال رہیں ، ان کے کپڑوں سے گو تمہیں بو آتی ہے ، مگر دل ذکر خدا سے مہک رہے ہیں ، یہ مخلص ہیں ، خدا پرست ہیں ، تم انہیں حقیر سمجھو ، تمہیں اختیار ہے ، مگر قدرت کی جانب سے یہ ملے شدہ امر ہے ، کہ یہی لوگ دنیا میں انقلاب پیدا کریں گے ، تم حرص وہوا کے بندے ہو ، تمہارے دلوں پر غفلت کے حجاب پڑے ہوئے ہیں ، تم اسلام کی برکات سے استفادہ نہیں کرسکتے ، تم جب تک دنیا کی ان کثافتوں میں پڑے ہوئے ہو ، صحبت نبوی (صلی اللہ علیہ وآلہ وسلم) سے فیضاب نہیں ہو سکتے ، اور تم ہرگز اس قابل نہیں ہو کہ پیغمبر مخلص مساکین کو چھوڑ کو تم مغرور اور متکبر انسانوں کے ساتھ بیٹھے اٹھے ۔