سورة الصف - آیت 4

إِنَّ اللَّهَ يُحِبُّ الَّذِينَ يُقَاتِلُونَ فِي سَبِيلِهِ صَفًّا كَأَنَّهُم بُنْيَانٌ مَّرْصُوصٌ

ترجمہ عبدالسلام بھٹوی - عبدالسلام بن محمد

بلاشبہ اللہ ان لوگوں سے محبت کرتا ہے جو اس کی راہ میں صف باندھ کر لڑتے ہیں، جیسے وہ ایک سیسہ پلائی ہوئی عمارت ہوں۔

تفسیر ثنائی - ثنا اللہ امرتسری

پس یہ اصولی بات یاد رکھ کر سنو ! ایمان کا دعویٰ رکھتے ہو تو جہاد کے لئے مستعد ہوجائو کیونکہ جہاد میں دو فائدے ہیں ایک ایمانی امتحان دوم یہ کہ اللہ تعالیٰ ان لوگوں کو دوست رکھتا ہے جو اس کی راہ میں صفیں باندھ کر ڈٹ کر دشمنان دین سے جہاد میں لڑتے ہیں ایسے ڈٹ کر لڑتے ہیں گویا وہ چونے گچ دیوار ہیں کیا مجال کہ دشمن کا رعب یا ضرب ان کو ہلا یا پھسلا سکے کیونکہ ان کا قول ہے۔ ؎ سب نکل جائیں گی او قاتل ہماری حسرتیں جبکہ سر اپنا تیرے زیر قدم دے دیں گے ہم