سورة آل عمران - آیت 83

أَفَغَيْرَ دِينِ اللَّهِ يَبْغُونَ وَلَهُ أَسْلَمَ مَن فِي السَّمَاوَاتِ وَالْأَرْضِ طَوْعًا وَكَرْهًا وَإِلَيْهِ يُرْجَعُونَ

ترجمہ عبدالسلام بھٹوی - عبدالسلام بن محمد

تو کیا وہ اللہ کے دین کے علاوہ کچھ اور تلاش کرتے ہیں، حالانکہ آسمانوں اور زمین میں جو بھی ہے خوشی اور ناخوشی سے اسی کا فرماں بردار ہے اور وہ اسی کی طرف لوٹائے جائیں گے۔

تفسیر اشرف الہواشی - محمد عبدہ لفلاح

ف5یعنی جب آسمان وزمین کی ہر چیز فرشتے،جن وانس وغیرہ۔اللہ تعالیٰ کے قانون فطرت کے سامنے سرنگوں ہے اور اختیا ری و غیر اختیاری طور پر اس کے تابع فرمان ہے تو یہ لوگ اس کے قانون شریعت، دین اللہ کو چھوڑ کر دوسرا راستہ کیوں اختیا رکرتے ہیں۔ ان کو چاہیئے کہ اگر نجات اخروی چاہتے ہیں تو جو اللہ تعالیٰ کا دین اس وقت آنحضرت (ﷺ) لے کر مبعوث ہوئے اس کو اختیار کرلیں۔ نیز دیکھئے ح آیت :84۔)