ذکر مصطفٰی صلی اللہ علیہ وسلم

درود نہ پڑھنے کی سزا! 1. سیدنا حسین بن علی رضی اللہ عنہما بیان کرتے ہیں کہ رسول اللہ صلی اللہ علیہ وسلم نے فرمایا: اَلْبَخِیلُ مَنْ ذُکِرْتُ عِنْدَہٗ؛ فَلَمْ یُصَلِّ عَلَيَّ ۔ ’’جو میرا ذکر سن کر مجھ پہ درود نہ پڑھے،وہ بخیل ہے ۔‘‘ (مسند الإمام أحمد : 1/201؛ سنن التّرمذي : 3546؛ فضل الصّلاۃ علی النبي للإمام إسماعیل القاضي : 32؛ المستدرک علی الصّحیحین للحاکم : 1/549، وسندہٗ حسنٌ) اس حدیث کو امام ترمذی رحمہ اللہ (3546)نے ’’حسن صحیح غریب‘‘،امام ابن حبان رحمہ اللہ (909)نے ’’صحیح‘‘اور امام حاکم رحمہ اللہ نے ’’صحیح الاسناد‘‘کہا ہے۔حافظ ذہبی رحمہ اللہ نے ’’صحیح‘‘ قرار دیا ہے۔ حافظ ابن حجر رحمہ اللہ فرماتے ہیں : لَا یَقْصُرُ عَنْ دَرَجَۃِ الْحَسَنِ ۔ ’’یہ حدیث حسن درجہ سے کم نہیں ۔‘‘ (فتح الباري : 11/186) 2. سیدنا ابو ہریرہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا: رَغِمَ أَنْفُ رَجُلٍ ذُکِرْتُ عِنْدَہٗ؛ فَلَمْ یُصَلِّ عَلَيَّ ۔ ’’ میرا ذکر سن کر بھی جو درود نہیں پڑھتا اس کی ناک خاک آلود ہو۔‘‘ (مسند الإمام أحمد : 2/254؛ سنن التّرمذي : 3545؛ فضل الصّلاۃ علی النبي للقاضي إسماعیل : 16، وسندہٗ حسنٌ) اس حدیث کو امام ترمذی رحمہ اللہ نے ’’حسن غریب‘‘ اور امام ابن حبان رحمہ اللہ (908)نے ’’صحیح‘‘ کہا ہے۔