زکوۃ ، عشر اور صدقۃالفطر فضائل احکام و مسائل

اس کے بعد فرمایا: ﴿ وَأَقَامَ الصَّلَاةَ وَآتَى الزَّكَاةَ ﴾ ’’وہ نماز قائم کرتا ہے اور زکاۃ ادا کرتا ہے۔‘‘ یعنی مومن زکاۃ ادا کرنے کے علاوہ مذکورہ ضرورت مندوں پر بھی اللہ کی رضا کے لیے یا مال کی محبت کے باوجود خرچ کرتا ہے۔ اس سے یہی واضح ہوتا ہے کہ اللہ تعالیٰ زکاۃ کے علاوہ بھی خرچ کرنے کی ترغیب دے رہا ہے اور اسے اہل ایمان کی خاص صفت بیان فرما رہا ہے۔ اگر آتی المال … سے بھی زکاۃ ہی مراد لی جائے تو پھر کلامِ الٰہی میں بلاوجہ تکرار لازم آتی ہے جبکہ اللہ کا کلام اس سے پاک ہے۔ چنانچہ علامہ رشید رضا مصری اس آیت کی تفسیر میں تفسیر ’’المنار‘‘ میں اپنے استاذ الشیخ محمد عبدہ کا قول نقل فرماتے ہیں : ((قال الاستاذ الامام: وھذہ الایتاء غیر ایتاء الزکاۃ الآتی، وھو رکن من ارکان البر، وواجب کالزکاۃ، وذلک حیث تعرض الحاجۃ الی البذل، فی غیر وقت اداء الزکاۃ …)) ’’پہلا اِیتاء (ضرورت مندوں پر خرچ کرنا) بعد میں آنے والے اِیتاء (زکاۃ) کے علاوہ ہے اور یہ ارکانِ بِرّ (نیکی اور حسن سلوک کرنے کے ارکان) میں سے ایک رکن ہے اور زکاۃ ہی کی طرح واجب ہے اور یہ جذبۂ حسن سلوک ہر اس موقع پر بروئے کار آئے گا جب بھی (اور جہاں بھی) مال خرچ کرنے کی ضرورت پیش آئے گی اور یہ ادائے زکاۃ کے وقت کے علاوہ ہو گا …‘‘ امام قرطبی رحمہ اللہ فرماتے ہیں :