زکوۃ ، عشر اور صدقۃالفطر فضائل احکام و مسائل

مئی 1979ء کے شمارے میں اس رسالے میں اسلام کی ایک اور مسلمہ عبادت، ’’زکاۃ‘‘ کا صریح انکار کیا گیا ہے اور ستم یہ ہے کہ اس متواتر عبادت کا انکار بھی ’’زکاۃ کا قرآنی مفہوم‘‘ کے خوشنما عنوان سے کیا گیا ہے۔ حدیث کے مأخذِ اسلام اور حجت شرعیہ تسلیم کرنے سے انکار کے پس پردہ اصل چیز اس ٹولے کے نزدیک ہے ہی یہ کہ اس کے بعد قرآن کے جس حکم، قانون اور ہدایت کو جو معنی بھی پہنا دیے جائیں اور اس کی کیسی ہی دُور ازکار تاویل رکیک کر لی جائے، اس کی کچھ گنجائش نکل آئے، کیونکہ قرآن کے ساتھ حدیث رسول کو بھی حسب ارشاد الٰہی: ﴿وَأَنزَلْنَا إِلَيْكَ الذِّكْرَ لِتُبَيِّنَ لِلنَّاسِ مَا نُزِّلَ إِلَيْهِمْ ﴾ (النحل 44:16) سامنے رکھا جائے تو پھر من مانی کرنے کی گنجائش ہی نہیں رہتی۔ حدیث شریف کی رو سے تو صلاۃ (نماز) کا مفہوم بھی متعین ہے اور زکاۃ کی صورت بھی مقرر، جس کی پشت پر امت مسلمہ کا چودہ سو سالہ عملی تواتر بھی موجود ہے۔ ان کا انکار کیوں کر کیا جاسکتا ہے؟ لیکن جب ان مسلمات کا انکار کر دیا گیا تو اس کے بعد اسلام کو مسخ کرنے کا راستہ ان کے لیے کھل گیا۔ اب پرویزی ’’قرآنی مفہوم‘‘ کی رو سے نہ نماز کا مطلب وہ ہے جس پر چودہ سو سال سے مسلمان عمل کرتے آرہے ہیں اور نہ زکاۃ کا وہ مطلب ہے جو مسلمان انفاقِ مال کی ایک متعین صورت سمجھتے آئے ہیں۔ اسی طرح دیگر عقائد اسلامیہ اور مسلمات (جیسے جنت، دوزخ، ملائکہ اور معراجِ جسمانی وغیرہ) کا حال ہے۔ ان کے نزدیک ان کی وہ صورتیں غلط ہیں جن پر مسلمان چودہ سو سال سے ایمان رکھتے اور ان پر عمل پیرا چلے آرہے ہیں اور نام، ان سب خلافِ اسلام و عقائدِ اسلامیہ سرگرمیوں کا ’’طلوع اسلام‘‘ ہے۔ سبحان اللہ! گویا، برعکس نہندنام زنگی کافور، والا معاملہ ہے۔