زکوۃ ، عشر اور صدقۃالفطر فضائل احکام و مسائل

مسلمانوں کی امداد کی ضرورت پیش آئے اور مسلمانوں کے تعاون کے بغیر ان کے لیے اپنے جسم و روح کا رشتہ برقرار رکھنا اوراپنے گھر واپس پہنچنا مشکل ہو جائے۔ توایسے مسافروں پرزکاۃ کی رقم خرچ کرنا جائزہے اور جو شخص دونوں جگہ ہی محتاج ہو، وہ مسافر تو بطریق اولیٰ زکاۃ کا مستحق ہے۔ زکاۃ کی تقسیم حالات و ضروریات کے مطابق ہونی چاہیے: بعض ائمہ کی رائے ہے کہ جن آٹھ مصارفِ زکاۃ کا ذکرقرآن مجید میں ہے، اگر مالک یا اس کا وکیل خود زکاۃ تقسیم کرے (سرکاری اہل کار۔ عامل۔ اس سے وصول کرکے بیت المال میں جمع نہ کرے) تو وہ زکاۃ کو سات حصوں میں تقسیم کرکے ساتوں مصارف پر تھوڑی تھوڑی خرچ کرے اور اگر خلیفۂ وقت کی طرف سے زکاۃ کے جمع کرنے اور تقسیم کرنے کا نظام قائم ہو تو وہ آٹھوں مصارف پر تقسیم کرے۔ لیکن یہ رائے جمہور کی رائے کے خلاف ہے۔ جمہور علماء یہی کہتے ہیں کہ آٹھ مصارف بیان کرنے کا مطلب یہ نہیں ہے کہ ہر شخص اپنی زکاۃ آٹھوں یا ساتوں حصوں پر تقسیم کرے، بلکہ ان مصارفِ ثمانیہ کے ذکر سے اس امر کی وضاحت مقصود ہے کہ یہ یہ افراد اور یہ یہ جگہیں ہیں جہاں زکاۃ کی رقم خرچ کرنی جائز ہے۔ اب یہ حالات پر منحصر ہے، چاہے زکاۃ انفرادی طور پر ادا کی جائے یا اجتماعی طور پر۔ کہ کون یا کون کون اس وقت زیادہ مستحق ہے؟ اس حساب سے زکاۃ کی تقسیم عمل میں لائی جائے گی۔ اگر ملک میں غربت و ناداری زیادہ ہے، جبکہ جہاد کا مرحلہ بھی سامنے نہیں ہے، اسی طرح اور بھی بعض مصارف زیادہ اہمیت کے حامل نہیں ہیں ، تو ساری زکاۃ فقراء و مساکین پر تقسیم کردینا بھی جائز بلکہ انسب ہے۔ اسی طرح اگر جہاد کا مرحلہ سامنے ہے تو ساری