زاد الخطیب (جلد4)

بلکہ اللہ تعالی تو آنکھوں کے اشاروں اور دلوں کے بھیدوں تک کو بھی جانتا ہے۔ فرمایا : ﴿ یَعْلَمُ خَآئِنَۃَ الْاَعْیُنِ وَمَا تُخْفِی الصُّدُوْرُ ﴾[1] ’’ وہ ( اللہ تعالی ) نظروں کی خیانت کو بھی جانتا ہے اور ان مخفی باتوں کو بھی جو سینوں نے چھپا رکھی ہیں۔‘‘ اسی طرح فرمایا : ﴿ وَاَسِرُّوْا قَوْلَکُمْ اَوِاجْہَرُوْا بِہٖ اِِنَّہٗ عَلِیْمٌ بِذَاتِ الصُّدُوْرِ ﴾ [2] ’’ اور تم چپکے سے بات کرو یا اونچی آواز سے، وہ تو دلوں کے راز تک جانتا ہے۔‘‘ اللہ تعالی بندے کے انتہائی قریب ہے، حتی کہ شہ رگ سے بھی زیادہ قریب ہے۔ فرمایا : ﴿وَلَقَدْ خَلَقْنَا الْاِِنْسَانَ وَنَعْلَمُ مَا تُوَسْوِسُ بِہٖ نَفْسُہٗ وَنَحْنُ اَقْرَبُ اِِلَیْہِ مِنْ حَبْلِ الْوَرِیْدِ﴾ ’’اور ہم نے انسان کو پیدا کیا ہے اور جو کچھ اس کے دل میں وسوسہ گزرتا ہے، ہم تو اسے بھی جانتے ہیں۔اور اس کی شہ رگ سے بھی زیادہ اس کے قریب ہیں۔‘‘[3] عزیزان گرامی ! ان تمام آیات کریمہ کو ذکر کرنے کا مقصد یہ ہے کہ جو اللہ ہمارے اعمال سے با خبر ہے، جو ہمیں ہر جگہ اور ہر وقت دیکھ اور سن رہا ہے، جو ہمارے انتہائی قریب ہے، جو ہمارے دلوں کے اندر چھپے ہوئے رازوں تک کو جانتا ہے، جو ہماری آنکھوں کے اشاروں تک سے واقف ہے…………ہمیں اس سے حیاء کرنی چاہئے اور اس سے ڈرتے ہوئے اس کی نافرمانی سے اجتناب کرنا چاہئے۔ اور حضرت عبد اللہ بن مسعود رضی اللہ عنہ بیان کرتے ہیں کہ رسول اکرم صلی اللہ علیہ وسلم نے ارشاد فرمایا : (( اِسْتَحْیُوا مِنَ اللّٰہِ حَقَّ الْحَیَائِ )) ’’ اللہ سے اُس طرح حیاء کرو جیسا کہ حیاء کرنے کا حق ہے۔‘‘ ابن مسعود رضی اللہ عنہ کہتے ہیں کہ ہم نے عرض کی : ((یَا رَسُولَ اللّٰہِ ! إِنَّا نَسْتَحْیِیْ وَالْحَمْدُ لِلّٰہِ )) ’’ اے اللہ کے رسول ! اللہ کا شکر ہے کہ ہم حیاء کرتے ہیں۔‘‘ تو آپ صلی اللہ علیہ وسلم نے فرمایا :(( لَیْسَ ذَاکَ، وَلٰکِنَّ الْاِسْتِحْیَائَ مِنَ اللّٰہِ حَقَّ الْحَیَائِ أَنْ تَحْفَظَ الرَّأْسَ وَمَا وَعٰی، وَالْبَطْنَ وَمَا حَوَی، وَلْتَذْکُرِ الْمَوتَ وَالْبِلٰی، وَمَنْ أَرَادَ الْآخِرَۃَ تَرَکَ زِیْنَۃَ الدُّنْیَا، فَمَنْ فَعَلَ ذَلِکَ فَقَدِ اسْتَحْیَا مِنَ اللّٰہِ حَقَّ الْحَیَائِ )) [4]

[1] المؤمن40 :19 [2] الملک67 :13 [3] ق50 :16 [4] جامع الترمذی : ۲۴۵۸۔وحسنہ الألبانی