زاد الخطیب (جلد2)

’’ تم میں سے کوئی شخص جب جمعہ کے روز اس وقت ( مسجد میں) آئے کہ امام خطبہ دے رہا ہو ، تو وہ دو رکعات ادا کرے اور ان میں تخفیف کرے ۔ ‘‘ جہاں تک جمعہ کے بعد نفل نماز کا تعلق ہے تو اس کے بعدچار رکعات کاپڑھنا سنت ہے۔ حضرت ابو ہریرہ رضی اللہ عنہ سے روایت ہے کہ رسول اکرم صلی اللہ علیہ وسلم نے ارشاد فرمایا : (( إِذَا صَلّٰی أَحَدُکُمُ الْجُمُعَۃَ فَلْیُصَلِّ بَعْدَہَا أَرْبَعًا)) ’’ تم میں سے کوئی شخص جب نمازِ جمعہ پڑھ لے تو اس کے بعد چار رکعات پڑھے ۔ ‘‘ ایک اور روایت میں اس کے الفاظ یہ ہیں : (( مَنْ کَانَ مِنْکُمْ مُصَلِّیًا بَعْدَ الْجُمُعَۃِ فَلْیُصَلِّ أَرْبَعًا )) ’’ تم میں سے کوئی شخص جب جمعہ کے بعد نماز پڑھنے والا ہو تو وہ چار رکعات پڑھے ۔ ‘‘ اس حدیث کے ایک راوی ( سہیل ) کا کہنا ہے کہ اگر تمہیں جلدی ہو تو دو رکعات مسجد میں اور دو رکعات گھر جا کر ادا کر لیا کرو ۔[1] اور حضرت ابن عمر رضی اللہ عنہ جب نمازِ جمعہ ادا کرکے گھر کو لوٹتے تو دو رکعات پڑھتے، اس کے بعد فرماتے : رسول اللہ صلی اللہ علیہ وسلم بھی اسی طرح کرتے تھے۔[2] فرض نماز کی اقامت کے بعد سنتوں کو چھوڑ دینا چاہئے حضرت ابو ہریرہ رضی اللہ عنہ سے روایت ہے کہ رسول اکرم صلی اللہ علیہ وسلم نے ارشاد فرمایا : (( إِذَا أُقِیْمَتِ الصَّلَاۃُ فَلَا صَلَاۃَ إِلَّا الْمَکْتُوْبَۃ [3])) ’’ جب نماز کی اقامت ہو جائے تو سوائے فرض نماز کے اور کوئی نماز نہیں ہوتی ۔ ‘‘ اور حضرت عبد اللہ بن مالک بن بحینہ رضی اللہ عنہ بیان کرتے ہیں کہ رسول اللہ صلی اللہ علیہ وسلم نے ایک آدمی کو دیکھا کہ وہ اقامت کے بعد دو رکعات نماز پڑھ رہا تھا ۔ جب آپ صلی اللہ علیہ وسلم نمازِ ( فجر ) سے فارغ ہوئے تو لوگوں میں گھل مل گئے ۔ اسی دوران آپ صلی اللہ علیہ وسلم نے اس شخص کو دیکھا تو فرمایا : (( آلصُّبْحَ أَرْبَعًا ؟ آلصُّبْحَ أَرْبَعًا ؟ )) ’’ کیا تم صبح کی چار رکعات پڑھتے ہو؟ کیا تم صبح کی چار رکعات پڑھتے ہو؟‘‘[4]

[1] صحیح مسلم :881 [2] صحیح مسلم : 882 [3] صحیح مسلم :710 [4] صحیح البخاری :663،صحیح مسلم :711