زاد الخطیب (جلد2)

’’ لیکن اگر تمھیں یہ خوف ہو کہ تم ان میں عدل وانصاف نہ کر سکو گے تو ایک ہی کافی ہے یا تمھاری ملکیت کی لونڈی ۔ یہ اس اعتبار سے زیادہ مناسب ہے کہ تم بے انصافی کے مرتکب نہیں ہو گے ۔ ‘‘ اور رسول اللہ صلی اللہ علیہ وسلم کا ارشاد گرامی ہے: (( مَنْ کاَنَتْ لَہُ امْرَأَتَانِ فَمَالَ إِلیٰ اِحْدَاہُمَا جَائَ یَوْمَ الْقِیَامَۃِ وَشِقُّہُ مَائِلٌ)) [1] ’’ جس شخص کی دو بیویاں ہوں اور وہ ان میں سے ایک ہی کی طرف مائل ہوا ( اور دوسری کو نظر انداز کردیا) تو قیامت کے دن وہ اس حالت میں آئے گا کہ اس کے جسم کا ایک حصہ ساقط ہو گا۔ ‘‘ 7۔ موت کے بعد بھی بیوی سے وفا کی جائے حضرت عائشہ رضی اللہ عنہا کا بیان ہے کہ مجھے رسول اللہ صلی اللہ علیہ وسلم کی بیویوں میں سے کسی پر کبھی اتنی غیرت نہیں آئی جتنی حضرت خدیجہ رضی اللہ عنہا پر آتی تھی حالانکہ میں نے انھیں نہیں دیکھا تھا لیکن رسول اللہ صلی اللہ علیہ وسلم اکثر وبیشتر اس کا تذکرہ کرتے رہتے تھے ۔ اور بعض اوقات بکری ذبح کرتے تو اس کے گوشت کے کچھ ٹکڑے حضرت خدیجہ رضی اللہ عنہا کی سہیلیوں میں بھی بھیجا کرتے ۔ اس پر میں کبھی کبھی یہ بھی کہہ دیتی کہ شاید دنیا میں اور کوئی عورت ہی نہیں ہے سوائے خدیجہ رضی اللہ عنہا کے ! تو آپ صلی اللہ علیہ وسلم ان کے فضائل ذکر کرتے اور فرماتے : ’’میری اولاد بھی اسی سے ہوئی ہے۔‘‘ [2] برادران اسلام ! بیٹی ، ماں اور بیوی کے حقوق کے متعلق قرآن وحدیث کی جو نصوص ہم نے ذکر کی ہیں ایک طرف انھیں سامنے رکھیں اور دوسری جانب زمانۂ جاہلیت کی عورت کی حالت کوبھی مد نظر رکھیں تو اس سے آپ کو بخوبی اندازہ ہو جائے گا کہ اسلام نے عورت کو معاشرے میں کتنا بڑا مقام دیا ہے اور اس کی کس طرح سے تکریم اور عزت افزائی کی ہے ! 2۔ زمانۂ جاہلیت کی عورت وراثت سے محروم تھی زمانۂ جاہلیت میں لوگ صرف مردوں کو وراثت کا حقدار سمجھتے تھے اور عورتوں اور بچوں کو اس سے محروم رکھا جاتا تھا۔ اس پر اللہ تعالیٰ نے یہ آیت نازل فرمائی :

[1] سنن أبی داؤد،النکاح باب فی القسم بین النساء:2133،سنن الترمذی،النکاح باب ما جاء فی التسویۃ بین الضرائر:1141، وصححہ الألبانی [2] صحیح البخاری،مناقب الأنصار باب تزویج النبی صلي الله عليه وسلم خدیجۃ وفضلہا:3818، صحیح مسلم:2437