زاد الخطیب (جلد1)

کیونکہ پاک وہند سے جو حضرات حج کی سعادت حاصل کرنے کیلئے جاتے ہیں وہ عموما حج تمتع ہی کرتے ہیں اور حج تمتع یہ ہے کہ حاجی اپنے ملک سے جاتے ہوئے جب میقات پر پہنچے تو احرام کا لباس پہن کر وہاں سے صرف عمرہ کی نیت کرے اور مکہ مکرمہ میں پہنچ کر عمرہ کرلے۔ اس کے بعد احرام اتار کر اس کی پابندیوں سے آزاد ہو جائے۔ پھر آٹھ ذو الحج کو اپنی رہائش گاہ سے دوبارہ احرام پہن کر حج کی نیت کرے اور منٰی کی طرف روانہ ہو جائے اور پھر مناسک حج مکمل کرے۔ تو آئیے سب سے پہلے عمرہ کے احکام تفصیل سے ذکر کرتے ہیں۔ عمرہ کے تفصیلی احکام 1۔ احرام: 1۔ احرام حج وعمرہ کا پہلا رکن ہے۔ اور اس سے مرادہے احرام کا لباس پہن کر تلبیہ کہتے ہوئے مناسکِ حج وعمرہ کو شروع کرنے کی نیت کر لینا اور ایسا کرنے سے اس پر چند امور کی پابندی کرنا لازمی ہو جاتا ہے۔ عمرے کا احرام میقات سے شروع ہوتا ہے۔ البتہ یہ ہو سکتا ہے کہ لباسِ احرام پہلے پہن لیا جائے اور نیت میقات سے کی جائے۔ میقات سے احرام باندھے بغیر گذرنا حرام ہے۔ اگر کوئی شخص ایسا کرے تو اسے میقات کو واپس آنا یا مکہ جا کر دم دینا پڑے گا۔ مواقیت حضرت عبد اللہ بن عباس رضی اللہ عنہ بیان کرتے ہیں کہ رسول اللہ صلی اللہ علیہ وسلم نے اہلِ مدینہ کیلئے ذو الحلیفۃ ( ابیار علی) ، اہلِ شام کیلئے الجحفۃ، اہلِ نجد کیلئے قرن المنازل اور اہلِ یمن کیلئے یلملم کو میقات مقرر فرمایا۔ یہ مواقیت اِن ملکوں کیلئے ہیں اور اُن لوگوںکیلئے بھی ہیں جو حج وعمرہ کی نیت سے ان مقامات سے گذریں اور جو لوگ ان مواقیت کے اندر ( مکہ مکرمہ کی جانب ) مقیم ہوں وہ اپنے گھروں سے ہی احرام کی نیت کریں حتی کہ اہلِ مکہ مکہ ہی سے احرام کی نیت کریں۔ ‘‘[1] 2۔اِحرام باندھتے وقت غسل کرنا، صفائی کے امور کا خیال کرنا اوربدن پرخوشبو لگاناسنت ہے۔ حضرت عائشۃ رضی اللہ عنہا بیان فرماتی ہیں کہ (کُنْتُ أَطَیِّبُ رَسُوْلَ اللّٰہَ صلي اللّٰه عليه وسلم لِإِحْرَامِہٖ حِیْنَ یُحْرِمُ ، وَلِحِلِّہٖ قَبْلَ أَنْ یَّطُوْفَ بِالْبَیْتِ) [2]

[1] صحیح البخاری:1524، صحیح مسلم:1181 [2] صحیح البخاری:1539،صحیح مسلم :1189