وسیلہ کی شرعی حیثیت

تبصرہ: روایت ’’ضعیف‘‘ اور’’ منکر‘‘ ہے ۔ 1.روح بن صلاح جمہور کے نزدیک ’’ضعیف‘‘ ہے۔ امام ابن عدی رحمہ اللہ نے ’’ضعیف‘‘ کہاہے ۔ (الکامل في ضُعَفاء الرّجال : 3/146) امام دارقطنی رحمہ اللہ کہتے ہیں : کَانَ ضَعِیفًا فِي الْحَدِیثِ ۔’’حدیث میں ضعیف تھا۔‘‘ (المُؤْتَلِف والمُختَلِف : 3/1377) ابن ماکولا رحمہ اللہ کہتے ہیں : ضَعَّفُوہُ ۔’’(جمہور)محدثین نے ’’ضعیف ‘‘کہاہے۔‘‘ (الإکمال : 5/15) ابن یونس رحمہ اللہ کہتے ہیں : رُوِیَتْ عَنْہُ مَنَاکِیرُ ۔’’اس سے منکر روایات بیان کی گئی ہیں ۔‘‘ (لسان المیزان لابن حجر : 2/467) حافظ ابن الجوزی رحمہ اللہ نے ’’ضعیف و متروک‘‘ راویوں میں ذکر کیا ہے۔ (کتاب الضّعفاء والمتروکین : 1/282) حافظ ہیثمی رحمہ اللہ کہتے ہیں : فِیہِ ضُعْفٌ ۔’’اس میں ضعف ہے۔‘‘(مَجمع الزّوائد : 9/257)