اصول فقہ(عثیمین)

کلام کلام کی تعریف: ’’ لغت میں معنی کے لیے وضع کیے گئے لفظ کو کلام کہتے ہیں ۔‘‘ اصطلاح میں …: مفید لفظ کو کہتے ہیں ۔ مثلاً : اللہ ربنا ( اللہ ہمارا رب ہے) ، محمد نبینا ( محمد صلی اللہ علیہ وسلم ہمارے نبی ہیں )۔ اور کم سے کم مقدار جس سے کلام بنتا ہے : وہ یا تو دو اسم ہیں ‘ یا اسم اور فعل۔ اس کی مثال : ’ ’ محمد رسول اللہ صلی اللہ علیہ وسلم ‘‘، اور دوسری مثال : ’’ استقام محمد ۔‘‘ محمد ثابت قدم رہے ۔ کلام کی واحد کلمہ ہے۔ یہ وہ اکیلا لفظ ہے جسے مفرد معنی کے لیے وضع کیا گیا ہو‘ یہ یا تو اسم ہوگا ‘ یا فعل ‘ یا حرف۔ ا: اسم : وہ ہے جو خود اپنے معنی پر دلالت کرے اور اس میں کوئی زمانہ بھی نہ پایا جائے۔ اس کی تین اقسام ہیں : اول: جو عموم کا فائدہ دیتے ہوں ‘ جیسے اسماء موصولہ ۔ دوم: جو اطلاق ( مطلق ہونے ) کا فائدہ دیتے ہوں ‘ جیسے اثبات کے سیاق میں نکرہ۔ سوم : جو خصوص کا فائدہ دیتے ہیں ‘ جیسے کہ نام۔ ب: فعل : جو خود اپنے معنی پر دلالت کرے‘ اور اس میں تین زمانوں میں سے کوئی ایک زمانہ بھی پایا جائے۔ ( یہ تین زمانے ) یا تو ماضی ہوگا جیسے : ’’ فَہِمَ‘‘ اس نے سمجھا ، یا مضارع ہوگا ‘ جیسے ’’ یَفْہَمُ ۔‘‘ وہ سمجھتا ہے یا سمجھے گا ۔‘‘ یا امر ( حکم ) ہوگا جیسے: ’’ إِفْہَمْ ‘‘ سمجھ۔