فتاوی علمیہ المعروف توضیح الاحکام

کیا آپ کے علم میں یہی روایت حدیث کی کسی دوسری کتاب میں امام حمیدی رحمہ اللہ کی سند کے ساتھ موجود ہے ؟ (ایک سائل) الجواب : حافظ ابو نعیم اصبہانی رحمہ اللہ ( متوفی 430ھ ) کی کتاب "المسند المستخریج علی صحیح الامام مسلم " میں امام حمیدی کی یہی روایت اثبات رفع یدین کے ساتھ موجود ہے۔ (دیکھئے ج ۲ ص ۱۲، مطبوعہ عباس احمد الباز مکۃ المکرمہ) (ہفت روزہ الاعتصام لاہور،۲۷/جون ۱۹۹۷ء) مسئلہ رفع یدین اور موطا امام مالک سوال : موطا امام مالک میں سیدنا عبداللہ بن عمر رضی اللہ عنہما اور سیدنا مالک بن حویرث رضی اللہ عنہ سے مروی رفع یدین والی احادیث میں صرف رکوع کے بعد رفع الیدین کا ذکر ہے جبکہ سنا ہے کہ امام بخاری نے امام مالک سے ہی سند لی ہے ۔ یعنی دونوں کی سند ایک ہے؟ (سید عبدالناصر، ضلع مردان ) الجواب: سیدنا مالک بن حویرث کی روایت موطا امام مالک میں نہیں ہے جبکہ سیدنا عبداللہ بن عمر رضی اللہ عنہما کی روایت موجود ہے : مَالِكٌ، عَنْ ابْنِ شِهَابٍ، عَنْ سَالِمِ بْنِ عَبْدِ اللهِ، عَنْ عَبْدِ اللّٰه بْنِ عُمَرَ؛ أَنَّ رَسُولَ اللّٰه صلى اللّٰه عليه وسلم، كَانَ إِذَا افْتَتَحَ الصَّلاَةَ، رَفَعَ يَدَيْهِ حَذْوَ مَنْكِبَيْهِ. وَإِذَا رَفَعَ رَأْسَهُ مِنَ الرُّكُوعِ، رَفَعَهُمَا كَذلِكَ أَيْضاً. وَقَالَ: سَمِعَ اللّٰه لِمَنْ حَمِدَهُ، رَبَّنَا وَلَكَ الْحَمْدُ، وَكَانَ لاَ يَفْعَلُ ذلِكَ فِي السُّجُودِ ( موطا امام مالک ص 113 ،حدیث : 59 روایۃ عبدالرحمن بن قاسم ) مؤطا امام مالک کی اس روایت میں شروع نماز ، رکوع سے پہلے اوررکوع کے بعد تین مقامات پررفع یدین کا اثبات ہے، یہی روایت امام بخاری نے نقل کی ہے ۔امام بخاری اور موطا امام مالک کی سند اور متن ایک ہی ہے ۔لہذا مدینہ کے امام اور بخارا کے امام کی روایت میں کوئی فرق نہیں ہے۔ (شہادت ،دسمبر 2001ء)