تلاوت قرآن میں قراء کرام کے اسالیب

جبکہ بعض صحابہ رضی اللہ عنہم تو اس سے بھی کم دنوں میں ختم فرماتے: سعد بن منذر انصاری کہتے ہیں انہوں نے رسول اللہ صلی اللہ علیہ وسلم سے تین دن میں قرآن پڑھنے کی اجازت طلب کی تو آپ نے فرمایا، ٹھیک ہے، لہٰذا وہ ہر تین دن میں قرآن ختم کرتے تھے۔[1] عبدالرحمان بن عبداللہ بن مسعود اپنے باپ سے روایت کرتے ہیں کہ وہ رمضان میں ہر تین دن میں قرآن ختم کرتے۔[2] البتہ ایک ہی رات میں قرآن ختم کرنا نبی کریم صلی اللہ علیہ وسلم سے ثابت نہیں بلکہ ممانعت ہے جیساکہ پیچھے گزر چکا ہے کہ سات دن سے یا کم از کم تین دن سے پہلے قرآن ختم نہیں کرنا چاہیے۔ تاہم یہ عمل بعض صحابہ اور بعض تابعین سے مروی ہے:ابن سیرین رحمہ اللہ سے روایت ہے کہ نائلہ بنت قرافصہ کلبیہ نے جب ( خارجی ) عثمان رضی اللہ عنہ کے قتل کے لیے آئے تو کہا: ان کو شہید کرو یا نہ کرو یہ تو رات شب بیداری میں یوں گزارتے ہیں کہ ایک رکعت میں قرآن مجید پڑھ لیتے ہیں۔[3] اسی طرح کی روایت تمیم داری کی بعض تابعین کے متعلق ہے جیسے سعید بن جبر اور علقمہ نخعی وغیرہ [4] یہ اوراس طرح کی دیگر روایات کو[5] اس بات پہ محمول کیا جائے گا کہ ان حضرات کو تین دن سے کم میں ختم ِ قرآن والی روایت کی ممانعت کا علم نہ ہو سکا۔

[1] ابوداؤد:2/55. [2] فضائل قرآن ابوعبید:ص35. [3] فضائل القرآن ابو عبید ص 35: قال: حدثناہشا م ، أخبرنامنصورعن ابی سیرین اورحجاج عن ابن جریج روایت کرتے ہیں مجھے ابن خفیصہ نے سائب بن یزید سے بیان کیا ہے کہ ایک شخص نے عبدالرحمان بن عثمان تیمی سے طلحہ بن عبداللہ کی نماز کے متعلق پوچھا تو انہوں نے کہا: کیا تجھے شبیب نے عثمان کی نماز کے متعلق کچھ نہیں بتایا ؟ انہوں نے کہا: بتایا ہے کہ وہ مقام ابراہیم کے پاس ایک رکعت میں قرآن پڑھتے تھے. [4] ایضاً. [5] اس سے عجیب و غریب واقعہ ابو عبیدنے فضائل قرآن میں ص:36 پر ذکر کیا ہے کہ سلیم بن عتیر تجیبی ایک رات میں تین مرتبہ قرآن ختم کرتے اور تین مرتبہ بیوی سے ہمبستری کرتے وہ فوت ہوئے تو ان کی بیوی نے کہا: اللہ تجھ پر رحم کرے تو نے اپنے رب کو بھی راضی کی اور اپنے گھر والوں کو بھی راضی کیا، پھر بتایا کہ وہ ہر ختم قرآن کے بعد ان کے پاس آتے ، پھر غسل کر کے قرآن ختم کرتے ،(مختصر )شاید یہ باب الکرامات سے ہے نہ کہ اسباب سے ۔ ٭اس طرح کی کرامات کی عمومی طورپرکوئی صحیح دلیل نہیں ہے۔ (مترجم).