تذکرہ محدث العصر علامہ محمد عبد الرحمن مبارکپوری رحمۃ اللہ علیہ

’’انھیں تجدد،فیشن اور یورپی تہذیب و ثقافت سے سخت نفرت تھی۔طلبا اور عقیدت مندوں کو مغربی لباس اور طور طریقے سے روکتے اور سادگی کا درس دیتے۔یہ اور اس قسم کی بہت سی باتیں مقدمہ’’تحفۃ الأحوذي’‘میں مرقوم ہیں۔جب مسند درس پر بیٹھ جاتے تو دورانِ درس کوئی کتنا ہی بڑا آدمی آ جاتا،اس کی طرف توجہ نہ فرماتے اور کسی کی پروا کیے بغیر تدریس کا سلسلہ جاری رکھتے۔اختتامِ درس کے بعد اس کی طرف توجہ فرماتے اور اس سے بات چیت کرتے۔‘‘(دبستانِ حدیث،ص: ۱۹۸،۱۹۹) آنکھوں کی بینائی سے محروم ہونے پر محدث مبارکپوری رحمہ اللہ کا صبر عظیم: زندگی کے آخری دور میں حضرت محدث مبارک پوری رحمہ اللہ نزول الماء کے عارضے میں مبتلا ہوئے،جس کی وجہ سے آنکھوں کی بینائی سے محروم ہو گئے۔اس عظیم آزمایش پر کسی قسم کی جزع فزع اور پریشانی کا اظہار نہیں فرمایا،بلکہ صبر فرمایا اور اس پر اجر و ثواب کے طالب و امیدوار ہوئے۔آپ کے عزیزو اقارب اورعقیدت مندوں نے بار بار آپ کو کہا کہ لکھنؤ،دہلی یا ممبئی جا کر کسی ماہر چشم سے اپنی آنکھوں کا معائنہ کرائیں۔ہو سکتاہے آپ کی آنکھوں کی بصارت لوٹ آئے۔لیکن حضرت محدث مبارک پوری رحمہ اللہ آمادہ نہ ہوتے اور فرماتے: اللہ تعالیٰ سے اس کا جو اجر و صلہ قیامت کو ملے گا،وہ علاج سے کہیں بہتر ہے۔ اسی دور میں آپ’’تحفۃ الأحوذي’‘کی تیسری اور چوتھی جلد کی تکمیل میں مصروف تھے۔بصارت سے محروم ہونے کی وجہ سے تحفۃ الاحوذی کی تکمیل کاکام رک گیا تو شیخ عطاء الرحمن مرحوم(بانی و مہتمم دارلحدیث رحمانیہ دہلی)نے شیخ الحدیث مولانا ابو الحسن عبید اللہ رحمانی مبارک پوری رحمہ اللہ کو تحفۃالاحوذی کی تکمیل کے لیے بہ طور معاون مبارک پور بھیج دیا،جنھوں نے حضرت مبارک پوری رحمہ اللہ کی پوری پوری معاونت کی اور تحفۃ الاحوذی پایۂ تکمیل کو پہنچی۔