توحید اسماء و صفات

کے ہر عمل میں اس کا ادراک ازروئے اخلاص اللہ تعالیٰ کیلئے ہوجاتاہے،اور ازروئے استقامت اللہ تعالیٰ کے ساتھ قائم ہوجاتا ہے اور ازروئے شریعت واتباع اللہ تعالیٰ کی راہ میں بن جاتا ہے، چنانچہ اسے کمال درجے کااخلاص، استقامت اورمتابعت بصورتِ تمام میسر آجاتاہے،اوریہ اللہ تعالیٰ کی طرف سے اعلیٰ درجے کی توفیق شمارہوتی ہے۔ سلفِ صالحین سے یہی تفسیر منقول ہے،جو ظاہرِ حدیث کے عین مطابق ،حقیقتِ حدیث کے عین موافق اور سیاقِ حدیث کیلئے بالکل متعین ہے۔اس میں نہ کسی قسم کی تاویل کا سہارالیا گیا ہے اور نہ ہی معنیٔ ظاہر سے انحراف اختیارکیاگیاہے۔(وﷲ الحمدوالمنۃ) بارہویں مثال:رسول اللہ صلی اللہ علیہ وسلم ایک حدیثِ قدسی میں اللہ تعالیٰ کا یہ فرمان نقل فرماتے ہیں: [من تقرب منی شبرا تقربت منہ ذراعا ومن تقرب منی ذراعا تقربت منہ باعاومن أتانی یمشی أتیتہ ھرولۃ] ترجمہ:جو شخص بالشت بھر میرے قریب آئے گا میں ایک ہاتھ اس کے قریب ہوجاؤنگا،اور جو ایک ہاتھ قریب آئیگا میں ایک گز اس کے قریب ہوجاؤنگا، اور جو میرے پاس چل کر آئے گا میں اس کی طرف دوڑ کر جاؤنگا۔ یہ حدیث صحیح مسلم، کتاب الذکر والدعاء میں ابوذر غفاری رضی اللہ عنہ کی روایت سے مروی ہے، امام مسلم نے اس معنی کی روایت ابوھریرۃ رضی اللہ عنہ سے بھی روایت فرمائی ہے،جبکہ صحیح بخاری، کتاب التوحید کے پندرھویں باب میں اسی قسم کی ایک حدیث بروایت ابوھریرۃ رضی اللہ عنہ مروی ہے۔