تقاریر وخطابات سید ابوبکر غزنوی

فساد نیّت اجر سے محروم کردیتا ہے میں یہاں اس بات کا واضح کردینا چاہتا ہوں کہ کشمیر کے مسلمان بھائیوں کی یاوری ومددگاری صرف اس لیے ہم پر واجب ٹھہری کہ وہ لاالٰہ الا اللہ کی گواہی دیتے ہیں اور محمد رسول اللہ صلی اللہ علیہ وسلم کے دامن سے وابستہ ہیں۔ وہ اسلامی اخوت ومؤدّت ہی کا رشتہ ہے جس نے ہم پر یہ فرض عائد کیا ہے ۔ میں وضاحت سے کہتا ہوں کہ جو شخص محض خون اور نسل کے رشتے کی بنیاد پر یارومددگار ہے وہ اس اجر وثواب کا ہرگز مستحق نہیں جس کا ذکر میں کرچکا ہوں۔ وہ ان آیات واحادیث مذکورہ کا ہرگز مخاطب نہیں ،گو اس نے بھی وہ تمام صعوبتیں اور کلفتیں جھیلیں جو ایک مجاہد جھیلتا ہے ،مگر فسادِ نیت کی بنا پر وہ اس ا جروثواب سے محروم رہا۔ پس اسلامی اخوّت ومؤدت کی بنا پر اسلام نے ہم پر واجب ٹھہرایا کہ ان کشمیری بھائیوں کی مال وجان سے مدد کریں۔ اس دفاع میں شریک ہونا اس لیے بھی ضروری ہوا کہ کشمیر کا الحاق ہندوستان کے ساتھ غیرآئینی طور پر اکثریت کے فیصلے کے خلاف ہوا اور اس پر غاصبانہ قبضہ کیا گیا۔ ان دونیتوں میں کوئی تعارض تو نہیں۔ یاد رکھئے کہ فریضہ دفاع میں کوتاہی ایک ایسی معصیت ،ایک ایسا فسق ہے جسے حدیث میں نفاق سے تعبیر کیا گیا ہے۔ صحیح مسلم میں ہے: ((مَن ماتَ ولَمْ يَغْزُ، ولَمْ يُحَدِّثْ به نَفْسَهُ، ماتَ علَى شُعْبَةٍ مِن نِفاقٍ.)) جو اس حالت میں دُنیا سے گیا کہ نہ تو کبھی اسلام کے دشمنوں سے جنگ کی اور نہ کبھی اپنے جی سے جہاد کی بات کہی یعنی جہاد کا عزم وارادہ بھی نہ کیا،تواس کی موت ایسی حالت پر ہوئی جو نفاق کی شاخوں میں سے ایک شاخ ہے۔ میرے بھائیو!آج مطلع غبار آلود ہے۔ خون کی لالی اُفق پر چھا گئی ہے۔ جنگ کی آگ بھڑک اُٹھی ہے اور کچھ بعید نہیں کہ اس کے شعلے ہماری سرحدوں کی طرف لپکیں۔ پس پاکستان