تقاریر وخطابات سید ابوبکر غزنوی

بسم اللہ الرحمٰن الرحیم نَحْمَدُهُ وَنُصَلِّی عَلٰی رَسُوْلِہِ الْکَرِیمُ کشمیر میں صورت حال نازک ہو گئی ہے۔ کشمیر کے مسلمان حیات و موت کی آخری کش مکش میں مبتلا ہیں۔ ایک ہمسایہ مسلمان قوم ہونے کی حیثیت سے ہم پر واجب ہے کہ ہم غور کریں کہ آج جب کہ کشمیر کے جیل خانے مظلوم اور مقہور مسلمانوں سے بھر گئے ہیں اور کشمیر کے محاز پر مسلمانوں کی لاشیں خاک و خون میں تڑپ رہی ہیں، اللہ اور اس کے رسول صلی اللہ علیہ وسلم کا تقاضا ہم سے کیا ہے؟ مسلمانان کشمیر کی مظلومیت تاریخ کی ایک کھلی ہوئی حقیقت ہے۔ کشمیر کے مسلمانوں نے گلاب سنگھ کے مظالم سہے پرتاب سنگھ کے جبر و تشدد کو برداشت کیا، ہر سنگھ کے ظلم و ستم کا شکار ہوئے۔ 14/اگست 1947؁ءکوملک کا بٹوارا ہوا اور پاکستان معرض وجود میں آیا۔ ریاستوں کو عوام کی تائید سےپاکستان یا ہندوستان سے الحاق کی اجازت دی گئی۔ 15۔ اگست 1947ء؁کو مسلمانان کشمیر نے ایک عظیم الشان اجتماع میں پاکستان کے ساتھ الحاق کا اعلان کیا، مگر سنگھ نے سازش کی اور بھارتی فوج سے مل کر عوام کی خواہش کے علی الرغم ہندوستان کے ساتھ الحاق اعلان کردیا اور ملک پر غاصبانہ قبضہ کر لیا۔ یوں اٹھارہ برس سے کشمیر کا مسلمان ڈوگرہ راج اور بھارتی سامراج۔ ۔ ۔ ان دو غلامیوں کے بوجھ تلے د ب کر کراہ رہا ہے۔ سختیاں جھیل جھیل کر ان کی رُوحیں زخمی ہوگئی ہیں۔ ان کے جسم مضمحل ہوچکے ہیں۔