تجوید کی تدریس کے طریقے

اللہ کے رسول صلی اللہ علیہ وسلم نے قرآن مجید کے سیکھنے کو مستحب قرار دیا ہے اور حضرت عقبہ بن عامر رضی اللہ عنہ کی روایت میں اس کی ترغیب بھی موجود ہے۔ وہ فرماتے ہیں: ((خَرَجَ رَسُوْلُ اللّٰہِ صلي اللّٰه عليه وسلم وَنَحْنُ فِی الصُّفَّۃِ۔ فَقَالَ: أَیُّکُمْ یُحِبُّ أَنْ یَّغْدُوَ کُلَّ یَوْمٍ إِلٰی بَطْحَانَ أَوْ إِلَی الْعَقِیْقِ، فَیَأْتِیْ مِنْہُ بِنَاقَتَیْنِ کَوْمَاوَیْنِ، فِیْ غَیْرِ إِثْمٍ وَ لَا قَطْعِ رَحِمٍ، فَقُلْنَا: یَا رَسُوْلَ اللّٰہِ نُحِبُّ ذٰلِکَ؟ قَالَ: ’’أَفَلَا یَغْدُوْ أَحَدُکُمْ إِلَی الْمَسْجِدِ فَیُعَلِّمَ أَوْ یَقْرَأَ اٰیَتَیْنِ مِنْ کِتَابِ اللّٰہِ عَزَّ وَ جَلَّ خَیْرٌ لَّہٗ مِنْ نَاقَتَیْنِ، وَ ثَلَاثٌ خَیْرٌ لَّہٗ مِنْ ثَلَاثٍ، وَ أَرْبَعٌ خَیْرٌ لَّہٗ مِنْ أَرْبَعٍ وَ مِنْ أَعْدَادِھِنَّ مِنَ الْإِبِلِ۔))[1] ’’اللہ کے رسول صلی اللہ علیہ وسلم ایک دن گھر سے نکلے اور ہم صحابہ کی ایک جماعت صفہ کے چبوترے پر تھے۔ آپ نے فرمایا: تم میں سے کون ایسا ہے جسے یہ پسند ہے کہ وہ بطحان یا عقیق کے بازار صبح کے وقت جائے اور دو موٹی تازی اونٹنیاں لے آئے۔ اور اس طرح لائے کہ نہ تو کسی گناہ میں ملوث ہو اور نہ ہی کسی قسم کی قطع رحمی کرے۔ ہم نے عرض کیا: اے اللہ کے رسول! ہمیں یہ پسند ہے۔ آپ نے فرمایا: تم سے کوئی ایک جب مسجد میں صبح کے وقت داخل ہو اور قرآن مجید کی دو آیات تلاوت کرے یا ان کا علم حاصل کرے تو یہ اس کے لیے دو اونٹنیوں سے بہتر ہے، اور تین آیات تین اونٹنیوں جبکہ چار آیات چار اونٹنیوں سے بہتر ہیں اور جتنی تعداد میں آیات بڑھائے گا وہ اتنی ہی اونٹنیوں سے بہتر ہیں۔‘‘ قرآن مجید کی درس وتدریس کے بارے جامع ترین حدیث حضرت عثمان کی ہے کہ اللہ کے رسول صلی اللہ علیہ وسلم نے فرمایا: ((خَیْرُکُمْ مَّنْ تَعَلَّمَ الْقُرْاٰنَ وَ عَلَّمَہٗ۔))[2]

[1] صحیح مسلم: ۱-۵۵۳. [2] صحیح البخاری: ۶-۱۰۸.