تجوید کی تدریس کے طریقے

’’یہ رمضان کا مہینہ ہے کہ جس میں قرآن مجید نازل کیا گیا ہے۔‘‘ اور کیا ہی بابرکت وہ رات ہے کہ جس رات میں اس کا نزول ہوا ہے۔ ارشاد باری تعالیٰ ہے: ﴿إِنَّا أَنزَلْنَاہُ فِیْ لَیْلَۃٍ مُّبَارَکَۃٍ﴾ ’’ہم نے اس کو ایک بابرکت رات میں نازل کیا ہے۔‘‘ اور اس کے نزول کی رات کو اللہ تعالیٰ نے ایک ہزار مہینے سے افضل قرار دیا ہے۔ ارشاد باری تعالیٰ ہے: ﴿إِنَّا أَنزَلْنَاہُ فِیْ لَیْلَۃِ الْقَدْرِ، وَمَا أَدْرَاکَ مَا لَیْلَۃُ الْقَدْرِ، لَیْلَۃُ الْقَدْرِ خَیْرٌ مِّنْ أَلْفِ شَہْرٍ،﴾ (القدر: ۱-۳) ’’ہم نے اس قرآن مجید کو لیلۃ القدر میں نازل کیا ہے۔ اور تمہیں کیا معلوم کہ لیلۃ القدر کیا ہے؟ لیلۃ القدر ایک ہزار مہینوں سے بہتر ہے۔‘‘ قرآن مجید میں قرآن کی فضیلت کے بارے یہ بھی مروی ہے کہ اس کی تلاوت کے سننے کے وقت رحمت نازل ہوتی ہے۔ ارشاد باری تعالیٰ ہے: ﴿وَإِذَا قُرِیئَ الْقُرْآنُ فَاسْتَمِعُواْ لَہُ وَأَنصِتُواْ لَعَلَّکُمْ تُرْحَمُونَ﴾ ’’اور جب قرآن مجید پڑھا جائے تو اس کو غور سے سنو اور خاموش رہو تا کہ تم پر رحم کیا جائے۔‘‘ اسی طرح اللہ تعالیٰ نے قرآن مجید کی عظمت بیان کرتے ہوئے کہا ہے: ﴿وَلَقَدْ آتَیْنَاکَ سَبْعاً مِّنَ الْمَثَانِیْ وَالْقُرْآنَ الْعَظِیْمَ﴾ ’’اور ہم نے آپ کو سات بار بار دہرائی جانے والی آیات اور قرآن عظیم دیا ہے۔‘‘ اور اس کی صفت ہدایت کے بیان میں کہا ہے: ﴿إِنَّ ہَذَا الْقُرْآنَ یِہْدِیْ لِلَّتِیْ ہِیَ أَقْوَمُ﴾ ’’بلاشبہ یہ قرآن مجید سیدھے ترین رستے کی طرف رہنمائی کرتا ہے۔‘‘