تجوید کی تدریس کے طریقے

اس آیت کا آخر بھی مفتوح ہے لیکن فتحہ مبنی ہونے کی وجہ سے ہے۔ استاذ دونوں آیات کی تین وجوہ کے ساتھ تلاوت کرے اور طلباء کو یہ واضح کرے کہ جب عارضی سکون کی اصل فتحہ ہو، چاہے وہ معرب ہونے کی بناء پر ہو یا مبنی، تو اس سے ما قبل حرف ِمد میں وقف کے وقت تین وجوہ جائز ہیں یعنی چھ حرکات، چار حرکات اور محض سکون کے ساتھ دو حرکات۔[1] پھر استاذ درج ذیل آیت لکھے: ﴿وَاللّٰهُ ذُو الْفَضْلِ الْعَظِیْمِ﴾ اس آیت کا آخر معرب ہونے کی بناء پر مکسور ہے۔ اور استاذ یہ آیت بھی لکھے: ﴿فَبِأَیِّ آلَائِ رَبِّکُمَا تُکَذِّبَانِ ﴾ اس آیت کا آخر مبنی ہونے کی بناء پر مکسور ہے۔ استاذ دونوں آیات کی تین وجوہ کے ساتھ تلاوت کرے۔پھر ان دونوں مثالوں میں رَوم کے ساتھ قصر کرے کیونکہ رَوم قصر ہی کی طرح ہے۔[2] اس سے طلباء کو یہ معلوم ہو گا کہ جب مد ِعارض کا آخر معرب یا مبنی ہونے کی بناء پر مکسور ہو تو اس میں چار وجوہ جائز ہیں اور چوتھی وجہ قصر مع الروم ہے۔ پھر استاذ یہ آیت لکھے: ﴿ہَلْ جَزَاء الْإِحْسَانِ إِلَّا الْإِحْسَانُ﴾

[1] محض سکون سے مراد خالص سکون ہے کہ جس میں رَوم یا اشمام نہ ہو. [2] رَوم سے مراد مخفی آواز کے ساتھ حرکت کا ایک جزء اس طرح ادا کرنا کہ کان لگا کر قریب بیٹھا ہوا تو اسے سن سکے لیکن دور والا نہ سن سکے۔ یہ اس لیے جائز ہے کہ یہ معلوم ہو سکے کہ کلمہ کی اعرابی حالت کسرہ ہے۔ اور یہ مجرور اور مرفوع میں بھی جائز ہے جبکہ اشمام کے قراء کے عرف میں چار معانی ہیں: (ا) ایک حرف کو دوسرے کے ساتھ خلط کرنا جیسا کہ لفظ ’’صراط‘‘ میں ہے اور لفظ ’’أصدق‘‘ اور ’’مصطیر‘‘ بھی اس کی مثالوں میں شامل ہیں۔ (ب) ایک حرکت کودوسری کے ساتھ خلط کرنا جیسا کہ لفظ ’’قیل‘‘ اور ’’غیض‘‘ وغیرہ میں ہے۔ (ج) حرکت کو اس طرح چھپانا کہ سکون اور حرکت کے بین بین محسوس ہو جیسا کہ﴿تَاْمَنَّا عَلَی یُوسُفَ﴾ میں ہے۔ (د) حرف کے سکون کے بعد دونوں ہونٹوں کو ملانااور یہ وقف میں ہوتا ہے۔ (إبراز المعانی من حرز المعانی: ص۵۶).