طہارت کے احکام ومسائل

غسل کا حکم اور اس کا طریقہ غسل کب واجب ہوتا ہے؟ جنابت اور خصوصاً جماع کی شکل میں غسل کب واجب ہو تا ہے ؟ 1۔ صحیح مسلم میں مروی ہے : (( اِذَا قَعَدَ بَیْنَ شُعَبِہَا الْأَرْبَعِ ثُمَّ أَلزَقَ الْخِتَانِ بِالْخِتَانِ فَقَدْ وَجَبَ الْغُسْلُ )) [1] ’’جب مرد اپنی بیوی کے چاروں ارکان (ہاتھ پاؤں) کے درمیان بیٹھ جائے اور اپنی جائے ختنہ عورت کی جائے ختنہ سے ملادے تو غسل واجب ہو گیا۔‘‘ 2۔ سنن ابن ماجہ اور مصنف ابن ابی شیبہ میں مروی ہے: (( اِذَا الْتَقَیٰ الْخِتَانُ بِالْخِتَانِ وَتَوَارَتِ الْحَشْفَۃُ فَقَدْ وَجَبَ الْغُسْلُ )) [2] ’’جب دونوں کی جائے ختنہ باہم مل جائیں اور مرد کا حشفہ ( عضوِ تناسل کا اگلا حصہ) عورت کی شرم گاہ میں داخل ہو جائے تو غسل واجب ہوگیا۔‘‘ 3۔ جب کہ صحیح بخاری و مسلم اور بعض دوسری کتبِ حدیث میں مروی ہے: (( اِذَا جَلَسَ بَیْنَ شُعَبِہَا الْأَرْبَعِ وَأَجْہَدَ نَفْسَہٗ (وَفِیْ رِوَایَۃِ: ثُمَّ جَہَدَ) فَقَدْ وَجَبَ الْغُسْلُ، أَنْزَلَ أَوْ لَمْ یُنْزِلْ )) [3] ’’جب مرد عورت کے ہاتھوں اور پاؤں میں بیٹھ گیا اور اس نے جماع کیا تو غسل واجب ہے، انزال ہو یا نہ ہو۔‘‘

[1] صحیح مسلم (۴؍ ۴۱۔ ۴۲) صحیح الجامع (۷۳۶) الفاظ تھوڑ ے سے مختلف ہیں لیکن معانی ایک ہی ہیں۔ [2] سنن ابن ماجہ، رقم الحدیث (۶۱۱) صحیح الجامع، رقم الحدیث (۳۸۶) [3] صحیح البخاري، رقم الحدیث (۲۹۱) صحیح مسلم مع شرح النووي (۴؍ ۳۹۔ ۴۰) الفتح الرباني (۲؍ ۱۱۳۔ ۱۱۴)