تفسیر سورۂ ق

﴿قَالَتْ لَہُمْ رُسُلُہُمْ إِن نَّحْنُ إِلاَّ بَشَرٌ مِّثْلُکُمْ وَلَـکِنَّ اللّہَ یَمُنُّ عَلَی مَنْ یَّشَآئُ مِنْ عِبَادِہٖ ﴾(ابراھیم:۱۱) ’’ان کے رسولوں نے ا ن سے کہا: بے شک ہم تو تمھاری طرح ہی بشر ہیں، اللہ اپنے بندوں میں سے جس پر چاہتا ہے احسان کرتا ہے۔‘‘ اور انھیں نبوت سے سرفراز فرمادیتا ہے۔آپ صلی اللہ علیہ وسلم سے بھی اعلان کروادیا: ﴿قُلْ إِنَّمَا أَنَا بَشَرٌ مِّثْلُکُمْ یُوْحیٰ إِلَیَّ أَنَّمَا إِلٰہُکُمْ إِلٰہٌ وَاحِدٌ ﴾ (الکہف:۱۱۰،فصلت :۶) ’’کہہ دیجئے کہ میں تمھاری طرح بشر ہوں، مجھ پر اللہ کی طرف سے وحی آتی ہے کہ تمھارا معبود ایک ہی معبود ہے۔‘‘ ﴿قُلْ لَّوْ شَآئَ اللّٰہُ مَا تَلَوْتُہٗ عَلَیْکُمْ وَلاَ أَدْرَاکُم بِہِ فَقَدْ لَبِثْتُ فِیْکُمْ عُمُراً مِّنْ قَبْلِہٖ أَفَلَا تَعْقِلُوْنَ﴾(یونس :۱۶) ’’کہہ دیجئے اگر اللہ چاہتا تو میں اس(قرآن) کو پڑھ کر تم کونہ سناتا اور نہ ہی اس کی کچھ خبر دیتا ،بے شک میں اس سے پہلے تم میں طویل عرصہ گزار چکا ہوں کیا تم کو عقل نہیں آتی۔‘‘ میں نے تم میں بچپن گزارا، جوانی گزاری، کاروبار کیا، باہمی معاملات کو نبٹایا ،تم نے مجھے صادق وامین کہہ کر پکارا،اس سے پہلے ایسی باتیں کیوں نہ کیں ،کیا اب یکایک (معاذ اللہ) اتنا ماہر اور جھوٹا بن گیا ہوں کہ قرآنِ مجید خود بنا کر تمھارے سامنے کلامِ الہٰی کے نام سے پیش کر دیا ہے،اگر یہ میرا کلام ہے تو اس جیسی ایک سورت تم بھی بنا لاؤ۔تعجب کی تب تو کوئی گنجائش تھی جب انسانوں کی راہنمائی کے لیے کسی غیر انسان کو بھیجا جاتا وہ اگر ایسا کلام پیش کرتا جس کی نظیر لانے سے سبھی انسان عاجز آجاتے ،تو وہ کہہ سکتے تھے کہ یہ کلام تو جنسِ غیر سے ہے، ہم ایسا کیونکر کر سکتے ہیں؟ ایک جنس دوسری جنس سے مختلف ، ان کے اعمال وافعال مختلف ، ان کا دائرۂ اختیار مختلف ، اس لیے مقابلہ کیسا؟ لیکن جب یہ کلام اس انسان نے پیش کیا ہے جو عرصۂ دراز تک ان میں رہا، اور وہ اس کا مقابلہ کرنے سے عاجز رہے ،تو