تفسیر سورۂ ق

ماہ میں بھی حفظ کیا، جس کی تفصیل بڑی ایمان افروز اور دلچسپ ہے ،مگر یہ اس کا محل نہیں۔ قرآن کی نظیر ناممکن ہے قرآن کی عظمتِ شان کا یہ پہلو بھی آج تک، بلکہ قیامت تک قائم رہے گا۔ جسے قرآنِ پاک نے تحدی اور چیلنج کے طور پر فرمایا ہے کہ تمام جن وانس مل کر بھی قرآ نِ پاک جیسی کتاب نہیں لا سکتے ۔(الاسراء:۸۸) قرآنِ مجیدجیسی کتاب لانا تو کجا ،وہ ایک سورت بھی نہیں لاسکتے ،چنانچہ فرمایا: ﴿وَإِنْ کُنْتُمْ فِیْ رَیْبٍ مِّمَّا نَزَّلْنَا عَلٰی عَبْدِنَا فَأْتُوْا بِسُوْرَۃٍ مِّنْ مِّثْلِہٖ وَادْعُوْا شُہَدَآئَ کُمْ مِّنْ دُوْنِ اللّہِ إِنْ کُنْتُمْ صَادِقِیْنَ ﴾ (البقرۃ:۲۳) ’’اگرتمھیں ا س چیز کے بارے میں کوئی شک ہے جو ہم نے اپنے بندے پر نازل کی ہے، تو لاؤ اس کی مانند کوئی سورت اور بلا لاؤاپنے حمایتیوں کو بھی اللہ کے سوا، اگر تم سچے ہو۔‘‘ یہی بات اللہ تعالیٰ نے سورۃ یونس میں بھی فرمائی ہے کہ ﴿أَمْ یَقُوْلُوْنَ افْتَرَاہُ قُلْ فَأْتُوْا بِسُوْرَۃٍمِّنْ مِّثْلِہٖ وَادْعُوْا مَنِ اسْتَطَعْتُمْ مِّنْ دُوْنِ اللّہِ إِنْ کُنْتُمْ صَادِقِیْنَ﴾(یونس:۳۸) ’’کیا یہ لوگ کہتے ہیں کہ اس(قرآن)کو خود بنا لیا ہے ۔ کہو، اگر تم اپنے اس الزام میں سچے ہو تو ایک سورت اس جیسی بنا لاؤ اور اللہ کے سوا جس جس کو اپنی مدد کے لیے بلا سکتے ہو بلا لو۔‘‘ تاریخ وواقعات شاہد ہیں کہ اس چیلنج کو مخاطبین نے اپنے تمام تر دعوایٰ فصاحت وبلاغت کے باوجود قبول نہیں کیا،انھوں نے اس کی بجائے کٹھن راہ اختیار کی، قرآنِ مجیداور اس کی دعوت کو ختم کرنے کے لئے انھوں نے اپنے مال،جان اور اولاد کی قربانی دی، بدر،احد، احزاب کے معرکے لڑے۔مگر وہ قرآنِ مجیدکے مقابلے میں ایک سورت بھی نہ بنا سکے۔