سورۃ الفاتحہ فضیلت اور مقتدی کےلیے حکم

کتاب: سورۃ الفاتحہ فضیلت اور مقتدی کےلیے حکم مصنف: مولانا محمد منیر قمرحفظہ اللہ پبلیشر: ام القریٰ پبلی کیشینز ترجمہ: حرفے چند اِنَّ الْحَمْدَ لِلّٰہِ نَحْمَدُہٗ وَ نَسْتَعِیْنُہٗ وَ نَسْتَغْفِرُہٗ وَنَعُوْذُ بِاللّٰہِ مِنْ شُرُوْرِ أَنْفُسِنَا وَ سَیِّئَاتِ أَعْمَالِنَا،مَن یَّہْدِہِ اللّٰہُ فَلَا مُضِلَّ لَہٗ وَمَنْ یُّضْلِلْ فَلَا ھَادِيَ لَہٗ،وَأَشْہَدُ أَنْ لَّا إِلٰہَ إِلاَّ اللّٰہُ وَحْدَہٗ لَا شَرِیْکَ لَہٗ،وَأَشْہَدُ أَنَّ مُحَمَّداً عَبْدُہٗ وَرَسُوْلُہٗ،أَمَّا بَعْدُ: قارئینِ کرام! السلام علیکم و رحمۃ اللہ و برکاتہ سورۃ الفاتحہ قرآنِ کریم کی پہلی سورت ہے،جو اگرچہ آیات کے اعتبار سے بہت ہی چھوٹی سی ہے،مگر اس کی عظمت و فضیلت اور مقام و مرتبہ بہت ہی بڑا ہے،جس کی تفصیل اس کتاب میں آپ کے سامنے آجائے گی۔ اس فضیلت و برکت والی سورت کو سبھی نمازی،ہر نماز کی تمام ہی رکعتوں میں پڑھتے ہیں اور بار بار پڑھے جانے کی وجہ ہی سے اسے’’السبع المثاني‘‘(بار بار پڑھی جانے والی سات آیات) کا نام دیا گیا ہے۔ البتہ ایک صورت ایسی ہے کہ اس میں نمازی کے اس سورت کو پڑھنے یا نہ پڑھنے میں اہلِ علم کے ما بین اختلاف پایا جاتا ہے اور وہ صورت ہے:’’امام کے پیچھے مقتدی کا سورت فاتحہ پڑھنا۔‘‘