سچے خوابوں کے سنہرے واقعات

معزول کردیا۔ تم اس منصب کے قابل نہیں ہو اور تم کسی شک شبہ والے امر میں قتل کردیے جاؤ گے، چنانچہ صفین کی جنگ میں یہ شخص قتل کردیا گیا۔‘‘ ’’تعبیر کرنے والے سے کسی نے پوچھا: میں نے خواب میں دیکھا ہے سورج اور چاند میرے پیٹ میں اتر گئے ہیں۔ انھوں نے اس کی تعبیر کی کہ یہ تیری موت کی علامت ہے۔ قرآن میں ہے: ’’پھر جب آنکھ پتھرا جائے گی۔ اور چاند گہناجائے گا۔ اور سورج اور چاند اکٹھے کردیے جائیں گے۔ اس دن انسان کہے گا کہ آج بھاگنے کی جگہ کہاں ہے؟‘‘[1] ’’ایک آدمی نے ابن سیرین رحمہ اللہ سے پوچھا: میں نے خواب میں دیکھا ہے کہ میرے ساتھ چار روٹیاں ہیں کہ یکایک سورج نکل آیا۔ آپ نے اس کی تعبیر یہ بتائی کہ تو چار دن میں مر جائے گا۔ پھر آیت پڑھی﴿ثُمَّ جَعَلْنَا الشَّمْسَ عَلَيْهِ دَلِيلًا ﴾’’پھر ہم نے سورج کو اس پر دلالت کرنے والا بنایا۔‘‘[2] انھوں نے چار روٹیوں کو چار دن کی روزی پر محمول کیا۔‘‘ ’’ایک شخص نے بتایا کہ میں نے خواب میں دیکھا، میں نے اپنی جیب لکڑی کھانے والے کیڑوں سے بھر لی ہے۔ آپ نے فرمایا: اس سے مراد تیری موت ہے، پھر آپ نے یہ آیت پڑھی: ’’پھر جب ہم نے اس پر موت کا فیصلہ کیا تو انھیں اس کی موت کا پتا نہیں دیا مگر زمین کے کیڑے (دیمک) نے جو اس کی لاٹھی کھاتا رہا۔‘‘[3] ’’کھجور کے درخت کی تعبیر مسلمان اور کلمہ طیبہ ہے۔‘‘ ’’باغ کی تعبیر عمل پر ہے۔ باغ جل جانے کا منظر دیکھنا عمل کی بربادی ہے۔‘‘

[1] القیامۃ 10-7:75۔ [2] الفرقان 45:25۔ [3] سبا 14:34۔