شرعی احکام کا انسائیکلوپیڈیا

چاند دیکھ کر ہی روزے ختم کرنا: سیدنا ابو ہریرہ رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ’’صوموا لرؤیتہ وأفطروا لرؤیتہ فإن غم علیکم فاکملوا شعبان ثلاثین‘‘ چاند دیکھ کر روزہ رکھو اور چاند دیکھ کر ہی افطار کرو۔اگر تم پر مطلع ابر آلود ہو تو شعبان کے تیس دن پورے کر لو۔(صحیح البخاری: ۱۹۰۹، صحیح مسلم: ۱۰۸۱) رؤیت ہلال کی دعا: [اس باب میں کوئی روایت ثابت نہیں ہے۔ اللھم أھلہ علینا بالأمن وغیرہ والی سب روایتیں ضعیف ہیں ۔ صحیح روایت میں صرف یہ آیا ہے کہ نبی صلی اللہ علیہ وسلم نے پہلی رات کے بعد والا چاند دیکھا تو فرمایا: ’’ اے عائشہ! اس کے شر سے اللہ کی پناہ مانگو۔‘‘ الخ ( سنن الترمذی: ۳۳۶۶ وسندہ حسن وقال الترمذی: ’’ حسن صحیح ‘‘ و صححہ الحاکم ۲/ ۵۴۰ ، ۵۴۱ ووافقہ الذہبی ) /زع ] اختلاف مطالع کا اعتبار کیا جائے گا: دیکھئے: (صحیح ابن خزیمہ ۳-۲۰۵ح ۱۹۱۶، ورواہ مسلم: ۱۰۸۷) مطلع کی حد کوئی ملک نہیں اس کی حد (۳۲) بتیس منٹ کا فرق ہے۔ اسی پر اختلاف مطالع ہو جاتا ہے ۔ تفصیل کے لئے دیکھئے: مرعاۃ المفاتیح (۴-۲۱۵) تنبیہ: اگر پہلی رات کا چاند تھوڑا سا بڑا نظر آئے تو اسے سابقہ دن کا خیال کرنا غلط ہے۔ (دیکھئے: صحیح ابن خزیمہ ۳/۲۰۶ح ۱۹۱۹) ٭: بیوہ یا مطلقہ کی عدت ،مدت حمل، رضاعت ، زکوٰۃ اور حج وغیرہ کا اعتبار چاند سے ہی لگایا جاتا ہے۔ جس شخص نے قربانی کرنی ہو وہ ذوالحجہ کے چاند طلوع ہونے سے لے کر قربانی کرنے تک نہ بال کاٹے اور نہ ناخن تراشے۔