شرعی احکام کا انسائیکلوپیڈیا

چہرے کو دھونے کے احکام چہرے کو دھونے کے احکام درج ذیل ہیں: وضو میں چہرے کادھونافرض ہے: اللہ تعالیٰ نے قرآن مجید میں فرمایا ہے: ﴿یٰٓاَایُّھَاالَّذِیْنَ اٰمَنُوْآ اِذَا قُمْتُمْ اِلَی الصَّلٰوۃِ فَاغْسِلُوْا وُجُوْھَکُمْ وَاَیْدِیَکُمْ اِلَی الْمَرَافِقِ ﴾ [ المآئدۃ: ۶] ’’ اے ایمان والو! جب نماز ادا کرنے کے لئے اٹھو تو پہلے اپنے چہرے اور کہنیوں تک ہاتھوں کو دھولو۔‘‘ امام نسائی نے ’’ سنن النسائی: ۱/۱۵‘‘ میں سیدنا علی بن ابی طالب رضی اللہ عنہ کی حدیث پر باب قائم کیا ہے: ’’ باب غسل الوجہ‘‘ چہرے کو دھونے کا بیان ۔ وضو میں چہرے کو ایک مرتبہ دھونابھی مسنون ہے: سیدنا عبداللہ بن عباس رضی اللہ عنہ سے روایت ہے کہ’’ توضأ النبي صلي اللّٰه عليه وسلم مرۃ مرۃ ‘‘ ’’ رسول اللہ صلی اللہ علیہ وسلم نے وضو میں ہر عضو کو ایک ایک مرتبہ دھویا۔‘‘ (صحیح بخاری: ۱۵۷) دو مرتبہ دھونابھی جائز ہے: سیدنا عبداللہ بن زید رضی اللہ عنہ سے روایت ہے کہ: ’’ أن النبي صلي اللّٰه عليه وسلم توضأ مرتین مرتین‘‘ ( صحیح بخاری: ۱۵۸) ’’بے شک رسول اللہ صلی اللہ علیہ وسلم نے وضو میں ہر عضو کو دو دو مرتبہ دھویا۔‘‘