شرعی احکام کا انسائیکلوپیڈیا

چہرے کے احکام چہرے کے احکام درج ذیل ہیں: مرد کے چہرے کے احکام: جن موقعوں پر چہرے کو قبلہ رخ کرنا ضروری یا مسنون ہے وہ درج ذیل ہیں: ۱۔ اذان دیتے وقت قبلہ رخ کھڑا ہونا ضروری ہے۔سیدنا ابو امامہ بن سہل رضی اللہ عنہ کے سامنے مؤذن نے قبلہ رُخ ہو کر اذان دی تھی۔ (مسند السراج: ۶۱ وسندہ صحیح) اس مسئلہ پر اجماع ہے۔امام ابن المنذر فرماتے ہیں: أجمع أھل العلم علٰی أن من السنۃ أن تستقبل القبلۃ بالأذان۔ ’’اس پر علماء کا اجماع ہے کہ اذان میں قبلہ رخ ہونا سنت ہے۔‘‘ ( الأوسط ۳/۲۸) نیز فرماتے ہیں کہ: وأجمعوا علٰی أن من السنۃ أن تستقبل القبلۃ بالأذان۔ اور اس پر اجماع ہے کہ اذان دیتے وقت قبلہ رخ ہونا چاہئے۔ ( الاجماع ص۷، فقرہ: ۳۹) نیز دیکھئے: موسوعۃ الاجماع في الفقہ الإسلامي (۱/۹۳) ۲۔ نماز پڑھتے وقت قبلہ رخ ہونافرض ہے۔مسلمان ہونے کے لئے شرط ہے کہ وہ نماز قبلہ رخ ہو کر پڑھے، جس نے اس کا انکار کیا وہ مسلمان نہیں ہے۔ سیدنا انس رضی اللہ عنہ سے روایت ہے کہ رسول اللہ صلی اللہ علیہ وسلم نے فرمایا: ’’ من صلّی صلاتنا واستقبل قبلتنا وأکل ذبیحتنا فذلک المسلم۔۔۔‘‘