کتاب: شرح تیسیر مصطلح الحدیث - صفحہ 32
۵۔الخبر:
معني لغوي :… خبر کا لغوی معنی ’’خبر‘‘ (حادثہ اور اطلاع) ہے[1] اور اس کی جمع ’’اَخْبَارْ‘‘ آتی ہے۔
معني اصطلاحي:… اس بابت تین اقوال ہیں ، جویہ ہیں :
۱۔ خبر، یہ حدیث کے مترادف(اور اس کے ہم معنیٰ) ہے۔ یعنی دونوں لفظوں کا اصطلاحی معنی ایک ہے۔
۲۔ خبر، یہ حدیث کے مغایر (ومقابل) ہے:یعنی حدیث تو وہ کہلائے گی جو نبی کریم صلی اللہ علیہ وسلم سے منقول ہو، جب کہ خبر وہ ہوگی آپ صلی اللہ علیہ وسلم کے علاوہ کسی اور سے منقول ہو۔
۳۔ خبر حدیث سے عام ہے: یعنی حدیث وہ ہے جو نبی کریم صلی اللہ علیہ وسلم سے منقول ہو، جب کہ خبر اس سے عام ہے چاہے وہ نبی کریم صلی اللہ علیہ وسلم سے منقول یا کسی دوسرے سے۔
۶۔ اَلْاَثَرُ:
معني لغوي:… کسی شی کا باقی ماندہ حصہ (نشان اور اس کی جمع ’’آثار‘‘ آتی ہے)۔
معني اصطلاحي: …اس کی بابت دو اقوال ہیں ، جو یہ ہیں :
۱۔ اثر یہ حدیث کے مترادف ہے:یعنی اثر اور حدیث کا اصطلاحی معنی ایک ہی ہے۔ (اسی نسبت سے محدّث کو ’’اَثريّ‘‘ بھی کہتے ہیں ۔
۲۔ یہ حدیث کے مغایر (ومقابل) ہے: چناں چہ اثر صحابہ رضی اللہ عنہم اور تابعین کی طرف منسوب اقوال و افعال کو کہتے ہیں ۔
۷۔ اَلْاِسْنَادُ:
اس کے دو معانی ہیں :۱۔ کسی بات کو اس کے کہنے والے کی طرف اس تک پہنچاتے ہوئے منسوب کرنا۔
۲۔ متن حدیث تک پہنچانے والے رجال (یعنی ناقلین و رواۃ) کا سلسلہ، اور اس معنی میں لفظِ اِسناد ’’سند‘‘ کا مترادف ہے۔
۸۔ اَلسَّنَدُ:
معني لغوي : سند کا لغوی معنی ’’سہارا‘‘ ہے اور ’’سند‘‘ کا نام سند اس لیے ہے کہ حدیث کا سہارا اس پر ہوتا ہے اور حدیث سند کی طرف منسوب ہوتی ہے(اور اس کی جمع اَسْنَاد آتی ہے)
معني اصطلاحي:… متن حدیث تک پہنچانے والے رجال کے سلسلہ کو سند کہتے ہیں ۔[2]
۹۔ اَلْمَتْنُ:
معني لغوي :… متن کا لغوی معنی زمین کا سخت اور ابھرا ہوا حصّہ ہے(زمین کی پشت کو بھی متن کہتے ہیں )۔
معني اصطلاحي:…متن اصطلاح میں اس کلام کو کہتے ہیں جس پر جاکر سند ختم ہو جاتی ہے(دوسرے لفظوں
[1] ایسی بات جو بذاتِ خود صدق اور کذب دونوں کا احتمال رکھتی ہو۔ (القاموس الوحید، ص: ۴۰۵)
[2] دوسرے لفظوں میں ناقلینِ حدیث و خبر کے ناموں پر مشتمل حصّہ کو سند کہتے ہیں ۔ علوم الحدیث ص۱۹۔