شرح حدیث ابن عباس

اللہ تعالیٰ سے استعانت صرف مشکلات اور حاجات ہی میں نہیں، بلکہ دین و دنیا کے تمام مصالح اللہ تعالیٰ کی مدد کے بغیر نہیں ہو سکتے۔ یہ استعانت وسیلہ ہے، تمام عبادات کے لیے بھی اور تمام حاجات کے لیے بھی۔ رسول اللہ صلی اللہ علیہ وسلم جب وعظ فرماتے تو خطبے میں کہتے: (( اَلْحَمْدُ لِلّٰہِ نَحْمَدُہُ وَنَسْتَعِیْنُہٗ )) [1] ’’سب تعریفیں اللہ کے لیے ہیں ہم اسی کی حمد کرتے ہیں اور ہم اسی سے مدد چاہتے ہیں۔‘‘ حضرت معاذ بن جبل رضی اللہ عنہ کو وصیت فرمائی کہ ہر نماز کے بعد یہ دعا کیا کرو: (( اَللّٰہُمَّ أَعِنِّيْ عَلٰی ذِکْرِکَ وَ شُکْرِکَ وَ حُسْنِ عِبَادَتِکَ )) [2] ’’اے اللہ! میری مدد فرما تیرا ذکر کرنے پر، تیرا شکر اَدا کرنے پر اور تیری اچھی عبادت کرنے پر۔‘‘ گویا اللہ تعالیٰ کا ذکر و شکر اللہ کی اعانت کے بغیر نہیں ہو سکتا۔ اس پر مداومت اور کماحقہ اس کی ادائیگی اللہ تعالیٰ کی اعانت کے بغیر ممکن نہیں ہے۔ سورۂ فاتحہ میں بھی عبادت کے بعد استعانت میں اسی طرف اشارہ ہے۔ آپ صلی اللہ علیہ وسلم کی دعاؤں میں سے ایک دعا یہ بھی ہے: (( رَبِّ أَعِنِّيْ وَ لَا تُعِنْ عَلَيَّ، وَ انْصُرْنِيْ وَ لَا تَنْصُرْ عَلَيَّ۔۔۔ إلخ )) [3] ’’اے میرے رب! میری اِعانت فرما اور میرے خلاف کسی کی اِعانت نہ کر اور میری مدد فرما اور میرے خلاف کسی کی مدد نہ کر۔‘‘ [1] صحیح مسلم (۸۶۸). [2] أبو داود (۱۵۲۲) ابن خزیمۃ (۱/ ۳۶۹) أحمد (۵/ ۲۴۴، ۲۴۵، ۲۴۷) وغیرہ. [3] أبو داود (۱۵۱۰) ترمذي (۳۵۵۱) أحمد (۱/ ۲۲۷) وغیرہ.