شرح ارکان ایمان

سال قبل اللہ تعالیٰ سے توفیق واستقامت طلب کر کے تصنیف و تألیف کی طرف قدم اٹھایا تھا تاکہ اللہ تعالیٰ مجھے آیت کریمہ : ﴿ اِنَّ الَّذِیْنَ یَکْتُمُوْنَ مَا اَنْزَلْنَا مِنَ الْبَیِّنَاتِ وَالْھُدٰی مِنْ بَّعْدِ مَا بَیَّنّٰہُ لِلنَّاسِ فِی الْکِتَابِ اُولٰئِکَ یَلْعَنَھُمُ اللّٰہ وَیَلْعَنُھُمُ اللّٰعِنُوْنَ ﴾ [1] ’’جو لوگ ہماری اتاری ہوئی دلیلوں اور ہدایت کو چھپاتے ہیں باوجودیکہ ہم اسے اپنی کتاب میں لوگوں کے لئے بیان کرچکے ہیں، ان لوگوں پر اﷲ کی اور تمام لعنت کرنے والوں کی لعنت ہے۔‘‘ میں مذکور وعید کی گرفت سے نکال کر ’’ بلغوا عنی ولوآیۃ ‘‘[2] کا مصداق بنادے۔ سب سے پہلے توحید باری تعالیٰ پر ایک مفصل کتاب ’’اضواء التوحید ‘‘ کے نام سے ترتیب دی، پھر کتاب ھذا ( شرح ارکان الایمان )مرتب کی۔ عقائد کے حوالے سے چند اور تألیفات کا کام بھی مکمل ہوچکا ہے۔ لیکن یہ سب کام غیر مرتب تھا، پھر مادری زبان بلوچی ہونے کی وجہ سے اردو تراکیب میں بہت خامیاں اور غلطیاں تھیں اور سب سے بڑھ کر وسائل کی کمی کا معاملہ بھی تھا، چنانچہ ان وجوہ کی بنا پر ان کتب کی طباعت کا کام مؤخر ہوتا رہا۔ اور احباب جماعت بلوچستان کی طلب و تڑپ بھی وقت کے ساتھ ساتھ بڑھتی رہی۔آخر کار دعائیں ثمر آور ہوئیں اور اللہ تعالیٰ کے خصوصی فضل و کرم سے میری یہ کتاب زیور طبع سے آراستہ ہوکر آپ کے ہاتھوں میں ہے۔ اضواء التوحید کی تصحیح کاکام تکمیل کے مراحل میں ہے اور اس کے کچھ ابواب کی کمپوزنگ بھی ہوچکی ہے، اب پوری توجہ اس کی طرف مبذول کررہا ہوں۔ یہ کتاب بھی بہت جلد منظر عام پرآجائے گی۔ان شاء اﷲ

[1] سورۃ البقرۃ:۱۵۹ [2] رواہ البخاری کتاب أحادیث الأنبیاء باب ماذکر عن بنی إسرائیل۔