شرح ارکان ایمان

یعنی:’’ مجھے اس ذات کی قسم جس کے ہاتھ میں میری جان ہے تم اس وقت تک جنت میں داخل نہیں ہوسکتے جب تک ایمان نہ لے آؤ....‘‘ مذکورہ تمام نصوص سے واضح ہوتا ہے کہ دخولِ جنت کیلئے صاحب ِایمان ہونا شرط ہے، اس مضمون کو قرآنِ حکیم نے یوں بیان فرمایا ہے: ﴿ مَنْ یَّکْفُرْ بِالْاِیْمَانِ فَقَدْ حَبِطَ عَمَلُہٗ وَھُوَ فِی الْآخِرَۃِ مِنَ الْخَاسِرِیْنَ﴾ یعنی:’’منکرین ایمان کے اعمال ضائع اور اکارت ہیں اور آخرت میں وہ ہارنے والوں میں سے ہیں۔‘‘ (سورۃ المائدۃ :۵) یہ تمام امور اس امر کو متقاضی ہیں کہ ہم حقیقتِ ایمان کی صحیح اور کامل معرفت حاصل کریں،اور خصوصاً باعتبارِ’’ مایؤمن بہ‘‘ایمان کے جملہ ارکان کو سمجھنے اور خصوصی طور پر ان دو یعنی اللہ پر ایمان اور اس کے رسولوں پر ایمان کو سمجھنے اور ان کا علم حاصل کرنے کی مکمل اور بھرپور کوشش کریں۔ بہت سے لوگ ایمان کے مذکورہ دوارکان کو مانتے تو ہیں لیکن ان کے بارہ میں ان کاعلم ومعرفت شرعی مراد کے مطابق نہیں ہوتا،حالانکہ شرعی حقائق کو اﷲتعالیٰ اور رسول اﷲ کی منشأومراد کے مطابق ماننا ضروری ہے، امام مقدسی رحمہ اﷲ نے اپنی کتاب ’’لمعۃ الاعتقاد ‘‘میں امام شافعی رحمہ اﷲ کا یہ قول نقل کیا ہے: ’’ نؤمن باللّٰہ وبماجاء من اللّٰہ علٰی مراد اللّٰہ ونؤمن برسول اللّٰہ وبما جاء عن رسول اللّٰہ علٰی مراد رسول اللّٰہ صلی اللّٰہ علیہ وسلم ‘‘ ’’ہم اﷲتعالیٰ پر ایمان لاتے ہیں اور اﷲتعالیٰ کی طرف سے جو کچھ آیا ہے اس پر اﷲتعالیٰ کی مراد کے مطابق ایمان لاتے ہیں، اسی طرح ہم رسول اللہ صلی اللہ علیہ وسلم پر ایمان لاتے ہیں اور رسول اللہ صلی اللہ علیہ وسلم کی طرف سے جو کچھ آیا ہے اس پر رسول اللہ صلی اللہ علیہ وسلم کی مراد کے مطابق ایمان لاتے ہیں ‘‘