سیدنا حسن بن علی رضی اللہ عنہما شخصیت اور کارنامے

’’الشہب اللامعۃ فی السیاسۃ النافعۃ‘‘ کے مصنف نے ذکر کیا ہے کہ ایک شخص نے حسن بن علی رضی اللہ عنہما کو ایک درخواست دی، آپ نے جواب دیا: میں نے آپ کی درخواست پڑھ لی، آپ کی ضرورت پوری کی جائے گی، آپ سے کہا گیا: اے نواسۂ رسول! اگر آپ اس کی درخواست پڑھ لیتے اور دیکھ لیتے کہ اس میں کیا ہے تو بہتر ہوتا، آپ نے فرمایا: میں ڈرتا ہوں کہ میرے پڑھنے تک وہ ذلت کی حالت میں میرے سامنے کھڑا رہے، پھر اس کے بارے میں مجھ سے سوال کیا جائے۔[1] ان کارناموں سے آپ کی خاکساری کے ساتھ ساتھ آپ کے حسنِ اخلاق اور عظمت کا بھی پتہ چلتا ہے، حسن رضی اللہ عنہ کی جانب سے یہ کوئی تعجب خیز چیز نہیں، چنانچہ انھی کا قول ہے: مکارم اخلاق دس ہیں: ۱۔ سچائی ۲۔ بہادری ۳۔ سائل کو نوازنا ۴۔ خوش اخلاقی ۵۔ احسان کا بدلہ دینا ۶۔ صلہ رحمی ۷۔ پڑوسی پر رحم کرنا ۸۔ صاحب حق کے حق کو پہچاننا ۹۔ کمزور کی مہمان نوازی ۱۰۔ ان سب سے اوپر حیا ہے۔[2] انھی کا قول ہے: بدخلقی سب سے بڑی مصیبت ہے۔[3] حسن رضی اللہ عنہ کے یہ کارنامے رسول اللہ صلی اللہ علیہ وسلم کی رہنمائیوں کا نتیجہ ہیں، چنانچہ عبداللہ بن دینار بعض صحابہ سے روایت کرتے ہوئے کہتے ہیں: پوچھا گیا کہ اے اللہ کے رسول ! اللہ کے نزدیک سب سے زیادہ محبوب کون ہے؟ تو آپ نے فرمایا: ((أَنْفَعُہُمْ لِلنَّاسِ، وَأَنَّ أَحَبَّ الْأَعْمَالِ إِلَی اللّٰہُ سُرُوْرٌ تُدْخِلُہٗ عَلٰی مُوْمِنٍ، تَکْشِفُ عَنْہُ کَرْبًا، أَوْ تَقْضِیْ عَنْہُ دَیْنًا، أَوْ تَطْرُدُ عَنْہُ جُوْعًا، وَ لَأَنَّ أَمْشِیَ مَعَ أَخِی الْمُسْلِمِ فِیْ حَاجَۃٍ أَحَبُّ إِلَیَّ مِنْ أَنْ أَعْتَکِفَ شَہْرَیْنِ فِیْ مَسْجِدٍ، وَ مَنْ مَشٰی مَعَ أَخِیْہِ الْمُسْلِمِ فِیْ حَاجَۃٍ حَتَّی یُثَبِّتَہَا لَہٗ ثَبَّتَ اللّٰہُ قَدَمَہٗ یَوْمَ تَزِلُّ فِیْہِ الْأَقْدَامُ، وَإِنَّ سُوْئَ الْخُلْقِ لَیُفْسِدُ الْعَمَلَ کَمَا یُفْسِدُ الْخَلُّ الْعَسَلَ)) [4]

[1] الشہب اللامعۃ فی السیاسۃ النافعۃ ص ۴۳۹ [2] من اقوال الصحابۃ محمد خورشید ص ۶۸، الحسن بن علی ص ۳۱ [3] تاریخ الیعقوبی ۲؍۲۲۷ [4] سلسلۃ الأحادیث الصحیحۃ رقم ۹۰۶، امام البانی نے صحیح الجامع میں اس کی سند کو حسن قرار دیا ہے۔