رُشدقرأت نمبر 2

اختلاف قراء ات ان تمام مقامات میں اس صیغہ میں دو قرا ء تیں ہیں : نمبر ۱۔ المُخلِصِینَ صیغہ اسم فاعل کے ساتھ نمبر۲۔ المُخلَصِینَ صیغہ اسم مفعول کے ساتھ امام عاصم رحمہ اللہ ،حمزہ رحمہ اللہ ،کسائی رحمہ اللہ ، اور خلف رحمہ اللہ ہرجگہ اس کو صیغہ اسم مفعول یعنی بفتحہ لام پڑھتے ہیں ۔باقی قراء ان تمام مقامات پر اس صیغہ کواسم فاعل کے وزن پر بکسر لام پڑھتے ہیں ۔ [النشر:۲/۲۹۵] توجیہ ومعنی قراء ات صیغہ اسم فاعل والی قراءت کا معنی تو یہ بنتا ہے کہ ان لوگوں نے اپنے دین اور اعمال کواللہ تعالیٰ کے لیے خالص کیا ہے اور اس معنی کی تائید اس آیت سے ہوتی ہے : ﴿إلَّا الَّذِیْنَ تَابُوْا وَأصْلَحُوْا وَاعْتَصِمُوْا بِاللّٰہِ وَأخْلَصُوْا دِیْنَھُمْ للّٰہ فاُولٰئِکَ مَعَ الْمُؤمِنِیْنَ﴾ ’’مگروہ لوگ جوتائب ہوئے،اصلاح کی،اوراللہ کے ساتھ جڑے رہے،اوراپنے دین کواللہ کے لئے خالص کیا،تویہ ہی مومنین کے ساتھ ہوں گی‘۔‘[النسآء :۱۴۶] اور صیغہ اسم مفعول والی قراءت کا معنی یہ بنتا ہے کہ اللہ نے ان کی برائیوں اور منکرات سے خالص کردیا ہے۔ اور اس معنی کی تائید اس آیت سے ہوجاتی ہے : ﴿إنا أخلصنٰھم بخالصۃ ذکری الدار ﴾ [ صٓ :۴۶] ’’ہم نے ان کوایک خاص بات کے ساتھ مخصوص کیاتھااور وہ آخرت کی یادہیں۔‘‘ کیونکہ مؤمنین میں یہ دونوں صفات پائی جاتی ہیں یعنی اللہ نے ان کو اخلاص کی توفیق دی ہے ۔اور انہوں نے اپنے دین کو ریاکاری سے خالی رکھاہے ۔لہٰذا ان تمام مذکورہ مقامات میں یہ کلمہ صیغہ اسم مفعول اورصیغہ اس فاعل دونوں طرح سے پڑھا گیا ہے تاکہ مؤمنین کی ان دونوں صفات پر دلالت ہوسکے ۔ نتیجہ قراء ات گویا یہ دونوں قراء تیں ایک دوسرے کے معنی کی تکمیل کرتی ہیں اور ساتھ ہی اس بات کی طرف اشارہ بھی ہوجاتا ہے کہ وہ لوگ جنہوں نے اپنے دین اور اپنے اعمال کو اللہ کے لیے خالص رکھا ہے، تواس اخلاص کی توفیق ان کو خود اللہ ہی نے دی ہے ان کا اپنا کمال نہیں ہے ۔یعنی مخلِص ( اسم فاعل)سے صرف یہ سمجھ میں آتاہے کہ وہ ازخوداخلاص کواختیارکرنے والاہے،یکنمخلَص(اسم مفعول)سے اس طرف اشارہ ملتاہے کہ اس کو اللہ تعالیٰ نے اخلاص کی نعمت عطاء فرمائی ہے،لہٰذااسکے اخلاص میں ایک خاص روحانی قوت بھی ہوگی۔ نمبر۹۔ أن یَغُلَّ/یُغَلَّ ﴿وَمَاکانَ لِنَبِیٍّ أن یَغُلَّ/یُغَلَّ ومن یّغلُل یأت بماغلّ یوم القیٰمۃِ، ثمّ توفّٰی کلُّ نفسٍ مّاکسبَتْ وَھُمْ لایُظلَمُونَ﴾ [آل عمران:۱۶۱]