رُشدقرأت نمبر 2

توجیہ قراء ات تخفیف والی قراءت ذِکْرٌ سے مشتق ہے جو کہ نسیان کی ضد ہے ۔جبکہ تشدید والی قرا ء ت تذکُّرسے مشتق ہے جس کا معنی ہے: تدبّر اور اتّعاظ یعنی غوروفکرکرنااورنصیحت حاصل کرنا ۔ تفسیر عثمانی میں ہے: ’’ یعنی قرآن کریم مختلف عنوانوں اور رنگ برنگ کے دلائل وشواہد سے ان مشرکین کو فہمائش کرتا ہے، لیکن بجائے نصیحت حاصل کرنے کے، یہ بدبخت اور زیادہ بدکتے اور وحشت کھاکر بھاگتے ہیں ۔‘‘ [تفسیرعثمانی:۱/۸۸۰،الاسراء:۴۱] معنی قراء ات امام قیسی رحمہ اللہ (م۴۳۷ھ ) لکھتے ہیں : ’’والتذّکر أولٰی بنا من الذّکرلہ بعد النسیان‘‘ ’’تذکرہمارے لئے زیادہ مناسب ہے نسیان کے بعد اس کویادکرنے سے ‘‘۔ آگے لکھتے ہیں : ’’فالتشدید للتدبر والتخفیف للذکر بعد النسیان۔‘‘ [الکشف: ۲/۴۷] ’’تشدیدتدبر کے معنی کے لئے ،اورتخفیف بھول کے بعدیادکرنے کے معنی کے لئے ہے۔‘‘ اسی طرح تفسیرزاد المسیر میں ہے: ’’والتّذکّـر:الا تّعاظ والتّد بّر۔‘‘ [زاد المسیر:۳/۲۶] تفسیر روح المعانی میں ہے : ’’وقرأحمزۃ والکسائی ھنا وفی الفرقان لیذکروا من الذکر الذی بمعنی التذکر ضد النسیان والغفلۃ،والتذکّر علی القراءۃ الأولیٰ بمعنی الا تّعاظ‘‘[روح المعانی : ۱۵/۸۲] ’’امام حمزۃ رحمہ اللہ اورکسائی رحمہ اللہ نے اس کلمہ کو یہاں اورسورہ فرقان میں مادہ ذکر سے پڑھاہے،جوکہ تذکرکے معنی میں ہے اور نسیان اورغفلت کی ضدہے۔ جبکہ تذکّر پہلی قراءت کے مطابق نصیحت حاصل کرنے کے معنی میں ہے۔‘‘ نتیجہ قراء ات خلاصہ یہ نکلا کہ اس آیت میں دو قراء تیں ہونے کی وجہ سے حکم کے دو پہلو نکل آئے : نمبر ۱۔ قرآن کا ذکر یعنی اس کی تلاوت کرنااوریاد کرنا۔ نمبر۲۔ قرآن سے وعظ ونصیحت حاصل کرنا ۔ اور یہ دو ایسے معنی ہیں جو ایک دوسرے کے بغیر نہیں پائے جاسکتے ۔یعنی ذکر کے بغیر نصیحت حاصل نہیں ہوسکتی اور نصیحت حاصل کئے بغیر ذکرناقص ہے۔ چنانچہ ان معانی کی تائید ایک اور آیت سے ہو جاتی ہے: ﴿ وَلَقَدْ یَسَّرْنَا الْقُرْاٰنَ لِلذِّکْرِ فَھَلْ مِنْ مُّدّکر﴾ [القمر :۱۷] اس آیت میں بھی ان دونوں معانی کو جمع کیا گیا ہے یعنی ذکر جوکہ نسیان کی ضد ہے اور اذتکار یا تذکرجو کہ غفلت کی ضد ہے، لیکن مذکورہ آیت میں یہ دونوں معانی ایک ہی کلمہ میں دو قراء توں کی بناء پر حاصل ہوجاتے ہیں ۔