رمضان المبارک فضائل ، فوائد و ثمرات

قومی زندگی کی مثال بالکل افراد و اشخاص کی سی ہے۔ بچپنے سے لے کر عہد شباب تک کا زمانہ ترقی و نشوونما وعیش و نشاط کا دور ہوتا ہے، ہر چیز بڑھتی ہے اور ہر قوت میں افزائش ہوتی ہے جو دن آتا ہے طاقت و توانائی کا ایک نیا پیام لاتا ہے، طبیعت جوش و امنگ کے نشے میں ہر وقت مخمور رہتی ہے اور اس سرخوشی و سرور میں جس طرف نظر اٹھتی ہے۔ فرحت و انبساط کاایک بہشت زار سامنے آجاتا ہے، اس طلسم زار ہستی میں انسان سے باہر نہ غم کا وجود ہے اور نہ نشاط کا، البتہ ہمارے پاس دو آنکھیں ضرور ایسی ہیں جو اگر غمگین ہوں تو کائنات کا ہر ظہور غم آلود ہے اور اگر مسرور ہوں تو ہر منظر مرقع انبساط ہے، عہد شباب و جوانی میں آنکھیں سرمست ہوتی ہیں اور دل جوش و امنگ سے متوالا، غم کے کانٹے بھی تلوے میں چھبتے ہیں تو معلوم ہوتا ہے کہ فرش گل پر سے گزر رہے ہیں ، خزاں کی افسردگی بھی سامنے آتی ہے تو نظر آتا ہے کہ عروس بہار سامنے آکر کھڑی ہو گئی ہے، دل جب خوش ہو تو ہر شئے کیوں نہ خوش نظر آئے؟ لیکن بڑھاپے کی حالت اس سے بالکل مختلف ہوتی ہے پہلے جو چیزیں بڑھتی تھیں اب روز بروز گھٹنے لگتی ہیں ، جن قوتوں میں ہر روز افزائش ہوتی تھی اب روز بروز اضمحلال ہوتا ہے، طاقت جواب دے دیتی ہے اور عیش و مسرت کنارہ کش ہو جاتے ہیں جو دن آتا ہے موت و فنا کا ایک پیغام لاتا ہے اور جو دن گزرتا ہے حسرت و آرزو کی ایک یادچھوڑ جاتا ہے، دنیا کے سارے عیش و عشرت کے جلوے دل کی عشرت کامیوں سے تھے لیکن دل کے بدلنے سے آنکھیں بھی بدل جاتی ہیں ۔ پہلے غم کی تصویر بھی شادمانی کا مرقع نظر آتی تھی اب خوشی کے شادیانے بھی بجتے ہیں تو ان میں سے دردو اندوہ کی صدائیں سنائی دیتی ہیں ۔