قرآن مقدس اور حدیث مقدس

مصنف اپنی کتاب کے صفحہ 33پر لکھتا ہے قرآن وسنت سے پاک پانی یاپاک مٹی کے بغیروضو اور طہارت نہیں ہوسکتی ماء طہور کے بغیر طہارت حاصل نہیں ہوسکتی بلکہ طہارت ووضو کے لئے جو پانی استعمال ہوچکا ہو دوبارہ اسی مستعمل پانی سے بھی وضو ء نہیں ہوسکتا قرآن میں فرمایا ’’ان لم تجدوا ماء فتیمموا صعیدا طیبا‘‘ اگر پاک پانی نہ مل سکے تو پاک مٹی سے وضو کرلو۔ یعنی تیمم کرلو جب وضو کے قائم مقام تیمم میں پاک مٹی ضروری ہوئی تو پھر اصل یعنی وضو میں پاک پانی ضروری کیوں نہ ہوگا۔ ۔۔۔ جواب:۔ حسب عادت مصنف نے یہاں بھی قرآن پربے جا الزام لگایا ہے جو آیت مصنف نے پیش کی وہ سورۃ المائدہ کی آیت 6ہے اس کا ترجمہ یوں ہے۔ ’’اگر تم پانی نہ پاؤ تو تیمم کرلو پاکیزہ مٹی سے۔ ۔۔۔۔‘‘ اس آیت کو پیش کرکے مصنف یہ ثابت کرنا چاہتا ہے کہ اگر کتا کسی پانی میں منہ ڈال دے تو وہ نجس ہوجاتا ہے یہ کس آیت سے استدلال لیا گیا ہے ؟؟جہاں تک امام زہری کا تعلق ہے جس پر مصنف نے اپنی کتاب کے صفحہ 34پر تنقید کی ہے کہ : ’’قال الزھری اذاولغ الکلب فی اناء لیس لہ وضوء غیرھ یتوضابہ۔۔۔۔‘‘ (صحیح بخاری کتاب الوضوء باب الماء الذی یغسل بہ شعرالانسان جلد1 باب 33) ’’امام زہری کہتے ہیں اگر کسی برتن میں کتا منہ ڈالے اس کے علاوہ اور پانی نہ ہو تو کتے کے اس جھوٹے سے وضو کیا جائے گا۔ ۔۔۔۔۔‘‘ یہ قول امام زہری کا حالت اضطرابی کے لئے ہے یعنی قرآن کہتا ہے کہ اگر پانی نہ پاؤ تو پاک مٹی سے تیمم کرو یعنی حالت اضطرابی میں اگر مٹی سے تیمم کو جائز قرار دیا گیا تو وہ تو بالاولی پانی ہی ہے جس میں کتے نے منہ ڈالاہے۔ یعنی امام زہری کا استدلال حالت مجبوری پر محصور ہے۔ کتنا ہی اچھا ہوتا کہ مصنف اعتراض سے پہلے سلف کے ا قوال کی طرف بھی رجوع کرلیتا۔