قرآن مجید میں احکامات و ممنوعات

کتاب: قرآن مجید میں احکامات و ممنوعات مصنف: ام عبد المتین عظمت فاطمہ پبلیشر: ام القری پبلی کیشنز گوجرانوالہ ترجمہ: بسم اللّٰه الرحمن الرحیم تقدیم إِنَّ الْحَمْدَ لِلّٰہِ نَحْمَدُہٗ وَ نَسْتَعِیْنُہٗ وَنَسْتَغْفِرُہٗ وَنَعُوْذُ بِاللّٰہِ مِنْ شُرُوْرِ أَنْفُسِنَا وَمِنْ سَیِّءآتِ أَعْمَالِنَا،مَنْ یَّہْدِہِ اللّٰہُ فَلَا مُضِلَّ لَہٗ وَمَنْ یُّضْلِلْ فَلَا ہَادِيَ لَہٗ،وَأَشْہَدُ أَنْ لاَّ إِلٰہَ إِلاَّ اللّٰہُ وَحْدَہٗ لَا شَرِیْکَ لَہٗ،وَأَشْہَدُ أَنَّ مُحَمَّداً عَبْدُہٗ وَرَسُوْلُہٗ۔أَمَّا بَعْدُ: قارئینِ کرام! السلام علیکم و رحمۃ اللہ وبرکاتہ قرآنِ کریم اللہ تعالیٰ کا کلامِ پاک ہے،جو مصادرِ شریعت میں سے اوّلین مصدر ہے۔ یہ نبیِ اکرم صلی اللہ علیہ وسلم کا معجزۂ خالدہ اور خوشگوار زندگی کے لیے کامل و شامل آسمانی دستور ہے۔ یہ قرآنِ کریم تمام جن و انس کے لیے ذریعۂ ہدایت اور خزینۂ رحمت ہے۔ جو اس کے احکام پر عمل پیرا ہو،اسے اللہ تعالیٰ عروج و ترقی کی رفعتوں سے آشنا کرتا ہے اور اسے پسِ پشت ڈالنے والوں کو تنزّل و اِدبار سے دوچار کر دیتا ہے۔ قرآنِ کریم حصولِ اجر و ثواب کا وہ ذریعہ ہے،جس کا صرف ایک حرف پڑھنے سے دس نیکیاں ملتی ہیں۔ قرآنِ کریم قلبی و روحانی اور جسمانی بیماریوں سے شفا کا باعث ہے۔