قرٖآن مجید کا رسم و ضبط

چنانچہ زیاد نے صورتحال کی نزاکت کو بھانپتے ہوئے یہ ترکیب سوجھی کہ ایک شخص کو، امام ابو الأسود رحمہ اللہ کے راستے میں بٹھا دیا، اور اس کو حکم دیا کہ جب تیرے پاس سے ابو الأسود رحمہ اللہ گزرے، تو قرآن مجید کی تلاوت شروع کر دینا، اور عمداً اس میں غلطی کر دینا، اس شخص نے ایسے ہی کیا، جب امام ابو الأسود رحمہ اللہ اس آدمی کے پاس سے گذرے، تو اس نے قرآن مجید کی تلاوت شروع کر دی اور پڑھا: ﴿ أَنَّ اللّٰهَ بَرِيءٌ مِنَ الْمُشْرِكِينَ وَرَسُولُهُ ﴾ (التوبہ:۳) (یعنی لفظ ﴿وَرَسُوْلہُ﴾ کے لام کو کسرہ کے ساتھ پڑھا)، جس کا مفہوم یہ بنتا ہے کہ ’’بے شک اللہ تعالیٰ مشرکوں اور اپنے رسول سے بری الذمہ ہے۔‘‘ جب امام ابو الأسود رحمہ اللہ نے سنا تو چونک کر کہا: معاذ اللہ! اللہ اپنے رسول سے کیسے بریٔ الذمہ ہو سکتا ہے۔ پھر فوراً زیاد کے پاس گئے اور کہا کہ میں آپ کا مطالبہ قبول کرتا ہوں اور قرآن مجید کے اعراب لگانے کا کام شروع کرتا ہوں۔ آپ میرے پاس تیس آدمی روانہ کر دیں۔ زیاد نے تیس (۳۰) آدمی امام ابو الأسود رحمہ اللہ کے پاس بھیج دئیے۔ انہوں نے ان تیس میں سے پہلے دس آدمی منتخب کیے، پھر ان دس میں سے باری باری ایک ایک کا انتخاب کرتے رہے یہاں تک قبیلہ عبد القیس کے ایک آدمی کو منتخب کر لیا اور اعراب لگانے کا کام شروع کر دیا۔ آپ نے اس شخص کو ہدایات دیتے ہوئے فرمایا: تم مصحف کی روشنائی سے مختلف روشنائی لے لو، اور میرے ہونٹوں کا دھیان رکھو، جب میں فتحہ کے لیے ہونٹ کھولوں تو حرف کے اوپر ایک نقطہ لگا دو، جب ہونٹوں کو گول کروں (یعنی ضمہ پڑھوں) تو حرف کے سامنے ایک نقطہ لگا دو، اور جب ہونٹوں کو جھکاؤں (یعنی کسرہ پڑھوں) تو حرف کے نیچے ایک نقطہ لگا دو، اور جب تنوین پڑھوں تو ایک کی بجائے دو دو نقطے لگا دو۔