قراءات قرآنیہ، تعارف وتاریخ

’’انصار کے ستر (۷۰) نوجوانوں کو ’’قراء کرام‘‘ کہا جاتا تھا، وہ رات کے وقت مدینہ منورہ کی کسی سمت میں جمع ہو جاتے، قرآن مجید کا دَور کرتے اور نماز ادا کیا کرتے تھے۔[1] یہی وہ صحابہ کرام تھے، جو ’’بئر معونہ‘‘ کے واقعہ میں شہید کر دئیے گئے تھے۔ یہ واقعہ ہجرت نبوی کے چھتیس (۳۶ ) ماہ بعد ماہ صفر میں پیش آیا تھا۔ طبقات ذہبی رحمہ اللہ میں منقول ہے کہ: ((کَانَ أُبَیٌّ یَخْتِمُ الْقُرْآنَ فِیْ ثَمَانٍ)) [2] (إسنادہ صحیح) ’’سیدنا أبی رضی اللہ عنہ آٹھ (دنوں) میں قرآن مجید ختم کیا کرتے تھے۔‘‘ اس نام کے اصطلاح یا شبہ اصطلاح کے طور پر عام ہونے کا سبب وہ احادیث مبارکہ ہیں، جنہیں امام ذہبی رحمہ اللہ نے ’’معرفۃ القراء: ۱/۳۳‘‘ میں نقل کیا ہے۔ ۱۔ سیدنا ابو قلابہ رضی اللہ عنہ سے مروی ہے کہ نبی کریم صلی اللہ علیہ وسلم نے فرمایا: ((أَقْرَؤُہُمْ أُبَیُّ بْنُ کَعْبٍ)) [3] ’’ابی بن کعب رضی اللہ عنہ ان میں سے سب سے بڑے قاری ہیں۔‘‘ ۲۔ سیدنا عبداللہ بن عمر رضی اللہ عنہ سے منقول ہے کہ نبی کریم صلی اللہ علیہ وسلم فرمایا کرتے تھے: ((اِسْتَقْرِؤُا الْقُرْآنَ مِنْ أَرْبَعَۃٍ: عَبْدِاللّٰہِ بْنِ مَسْعُوْدٍ وَ سَالِمٍ مَوْلٰی أَبِیْ حُذَیْفَۃَ وَمَعَاذِ بْنِ جَبَلٍ وَأُ بَیِّ بْنِ کَعْبٍ)) [4] ’’تم چار لوگوں سے قرآن مجید پڑھو، سیدنا عبداللہ بن مسعود رضی اللہ عنہ سے، سیدنا سالم مولی ابو حذیفہ رضی اللہ عنہ سے، سیدنا معاذ بن جبل رضی اللہ عنہ اور سیدنا ابی بن کعب رضی اللہ عنہ سے۔‘‘

[1] المغازی: ۲/۳۴۷. [2] معرفۃ القراء: ۱/۳۳. [3] ایک روایت کے الفاظ کچھ یوں ہیں۔ ((أقرؤکم أبی بن کعب)) ’’ابی بن کعب رضی اللہ عنہ تم میں سے سب سے بڑے قاری ہیں۔‘‘. [4] صحیح بخاری میں ((خذوا القرآن…)) ۶/۲۲۹ کے الفاظ ہیں.