کتاب: قبر کا بیان - صفحہ 74
5 قبر میں لرزش :
گوجرانوالہ کے نواحی قصبہ کھیالی کے قبرستان میں دفن کی جانے والی خاتون کی قبر میں لرزش کے واقعے نے علاقے میں خوف و ہراس پھیلا دیا ۔ تفصیلات کے مطابق عورت کو جب قبر میں دفن کیا گیا تو وہاں موجود لوگوں نے محسوس کیا کہ مرحومہ کی قبر لرز رہی ہے۔ بعض لوگوں نے قبر کے ساتھ کان لگا کر آواز سنی تو قبر کے اندر سے ٹھک ٹھک کی آوازیں اور دھمک سنائی دی، چنانچہ ایک معروف عالم دین سے رابطہ کیا گیا تو انہوں نے میت کو کسی دوسری جگہ دفن کرنے کا مشورہ دیا جس پر لوگوں نے اس عالم کی موجودگی میں ہی قبر کھود ڈالی جونہی تختے ہٹائے گئے تو عجیب و غریب سی تیز قسم کی بو سے گورکن کو قے کے دورے آنے لگے جس پر قبر دوبارہ بند کردی گئی اور میت کے لئے مغفرت کی دعا کی گئی جس کے بعد آہستہ آہستہ لرزش ختم ہوگئی ۔ [1]
6 سانپ سانپ :
ایک زمیندار گھرانے کی صاحب حیثیت ماں باپ کی اکلوتی اولاد کو ورثہ میں بہت بڑی جائیداد ، ڈھیروں سونا اور نقد روپے ملے۔ روپیہ اللہ کی راہ میں خرچ کرنے سے اسے سخت کوفت ہوتی۔ اگر کوئی خاتون اسے مسجد ، مدرسہ وغیرہ بنوانے یا کسی یتیم اور بیوہ کو مدد کرنے کا کہتی تو اس کا چہرہ مکدر ہوجاتا۔ میں نے آخری بار اسے 1968 ء میں بستر مرگ پر بے ہوشی کی حالت میں سول ہسپتال لاہور کے انتہائی نگہداشت ( I.C.U ) وارڈ میں دیکھا۔ اس کی نبضیں ڈوب چکی تھیں ، سانس رک رک کر وقفوں وقفوں سے آرہی تھی، آنکھیں پتھرا چکی تھیں ۔ ڈاکٹر صاحب قریب کھڑے تھے تاکہ اس کی موت کا سرٹیفیکیٹ دے کر رخصت ہوں ۔ اچانک اس کے بدن نے حرکت شروع کردی ،اس کے چہرے پر خوف کے آثار نمودار ہوئے ،رونگٹے کھڑے ہوگئے،جسم سے پسینہ بہہ نکلا، اس کے ہونٹ ہلنے لگے۔ سب لوگوں نے سنا کہ وہ تھرائی ہوئی آواز میں ’’سانپ سانپ‘‘ کہہ کر اس سے بچنے کے انداز میں ہاتھ پاؤں ہلا رہی تھی ۔ میں یہ مشاہدہ کرکے خوف زدہ ہوگیا اور ڈاکٹر صاحب سے پوچھا ’’طبی نقطہ نظر سے آپ اس کی آخری حرکت کو کیا نام دیں گے؟‘‘ڈاکٹر صاحب نے بھی حیرت کا
[1] 1۔ روزنامہ نوائے وقت ، لاہور 23جون 1993ء