کتاب: پیغام مسلم - صفحہ 61
پریشانی کی کوئی بات نہیں: 1امانت کی حفاظت 2سچی بات 3اچھااخلاق 4اور حلال و پاکیزہ کھانا۔‘‘
(۲۷) سود لعنت کا باعث ہے:
سیدناعبداللہ بن مسعود رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا:
((لَعَنَ اللّٰہُ آکِلَ الرِّبَا وَمُوکِلَہٗ وَشَاہِدَیہِ۔))[1]
’’سود کھانے والے، کھلانے والے اور گواہ بننے والے پر اللہ تعالیٰ کی لعنت ہے۔‘‘
(۲۸) ہر نشہ آور چیز حرام ہے:
سیدنا عبداللہ بن مغفل رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا:
((اجْتَنِبُوا کُلَّ مُسْکِرٍ)) [2]
’’ہر نشہ آور چیز سے اجتناب کیا کرو۔‘‘
(۲۹) صحت ، امن اور رزق بہترین نعمتیں ہیں:
سیدنا عبیداللہ بن محصن الخطمی رضی اللہ عنہ بیان کرتے ہیں کہ رسول اللہ صلی اللہ علیہ وسلم نے فرمایا:
((مَنْ أَصْبَحَ مِنْکُمْ آمِنًا فِی سِرْبِہٖ مُعَافًی فِی جَسَدِہٖ عِندَہٗ قُوتُ یَومِہٖ فَکَأَنَّمَا حِیزَتْ لَہُ الدُّنیَا بِحَذَافِیرِھَا)) [3]
’’جس شخص نے صبح اس حال میں کی کہ وہ اپنے گھر میں امن سے ہو، اسے بدنی طور پر عافیت وتندرستی حاصل ہو، اور اس کو ایک دن کی خوراک حاصل ہو تو گویا اسے پوری دنیا اکٹھی کرکے دے دی گئی ہے۔‘‘
[1] صحیح الجامع: ۵۰۹۰، ۵۰۸۹.
[2] صحیح الجامع: ۱۴۷.
[3] صحیح الجامع: ۶۰۴۲.