نماز نفل کتاب و سنت کی روشنی میں

اور ایک نو جوان تمیم بن حذلم نے حضرت عبد اللہ بن مسعود رضی اللہ عنہ کے پاس آیتِ سجدہ کی تلاوت کی تو انہوں نے اس سے کہا : تم سجدہ کرو ، اور اس میں تم ہمارے امام ہو ۔ [البخاری معلقا : کتاب سجود القرآن باب من سجد لسجود القاریء ۔ قال الحافظ : وصلہ سعید بن منصور ] لہذا وہ سننے والا جو قاریٔ قرآن کی تلاوت کو بغور سن رہا ہو ، اور وہ اسے سنتے ہوئے اس کی متابعت بھی کر رہا ہو ، تو اگر قاریٔ قرآن سجدہ کرے تو وہ بھی کرے ، اور اگر وہ نہ کرے تو وہ بھی نہ کرے ۔ [ فتح الباری : ۲/۵۵۸ ، المغنی لابن قدامہ : ۲/۳۶۶ ، الشرح الممتع لابن عثیمین : ۴/۱۳۱ ] اور رہا وہ سامع جو سماعِ قرآن کا قصد نہیں کرتا بلکہ کہیں سے گذرتے ہوئے اس نے قراء ت سن لی ، اور قاری نے سجدہ کیا ، تو سامع پر لازم نہیں کہ وہ بھی سجدہ کرے ، جیسا کہ حضرت عمران بن حصین رضی اللہ عنہ کے متعلق مروی ہے کہ وہ اسے اس پر واجب نہیں سمجھتے تھے ۔ [ البخاری معلقا : کتاب سجود القرآن باب من رأی أن اللہ عز وجل لم یوجب السجود ۔ قال الحافظ : وصلہ ابن ابی شیبہ ] اور حضرت سلمان الفارسی رضی اللہ عنہ کا کچھ لوگوں سے گذر ہوا جو کہ بیٹھے قرآن مجید پڑھ رہے تھے ، اور جب انہوں نے آیتِ سجدہ کو پڑھا تو سجدے میں پڑ گئے ، تب حضرت سلمان رضی اللہ عنہ سے بھی کہا گیا تو انہوں نے کہا : ( مَا لِہٰذَا غَدَوْنَا ) ’’ ہم اس کام کیلئے نہیں نکلے تھے ‘‘ [البخاری معلقا : وقال الحافظ : وصلہ عبد الرزاق ، وقال : إسنادہ صحیح ] اور حضرت عثمان رضی اللہ عنہ کا کہنا ہے : ( إِنَّمَا السَّجْدَۃُ عَلٰی مَنِ اسْتَمَعَہَا ) ’’سجدۂ تلاوت اس پر ہے جو آیتِ سجدہ کو بغور سنے ۔‘‘[المرجع السابق ]