نماز نبوی صحیح احادیث کی روشنی میں مع حصن المسلم

’’میں شیطان مردود سے عظمت والے اللہ، اس کے عزت والے چہرے اور اس کی قدیم بادشاہت کی پناہ چاہتا ہوں۔‘‘ [1] مسجد سے نکلنے کی دعا سیدنا ابواسید رضی اللہ عنہ روایت کرتے ہیں کہ رسول اللہ صلی اللہ علیہ وسلم نے فرمایا: ’’جب تم مسجد سے نکلو تو یہ پڑھو: اللَّهُمَّ إنِّي أَسْأَلُكَ مِن فَضْلِكَ ’’اے اللہ! بے شک میں تجھ سے تیرا فضل مانگتا ہوں۔‘‘ [2] ایک روایت میں مسجد سے نکلنے کی دعا ان الفاظ سے بھی منقول ہے: بسمِ اللهِ والصلوة والسَّلامُ على رسولِ اللهِ اللَّهُمَّ إنِّي أَسْأَلُكَ مِن فَضْلِكَ اللهمَّ اعصِمْني مِنَ الشيطانِ الرجيمِ ’’اللہ کے نام کے ساتھ (میں نکلتا ہوں) اور درود و سلام ہورسول اللہ صلی اللہ علیہ وسلم پر۔ اےاللہ! میرے لیے اپنے فضل کے دروازے کھول دے۔ اے اللہ! مجھے شیطان مردود سے بچا کے رکھ۔‘‘ [3] مسجد میں بلند آواز سے باتیں کرنا منع ہے: سیدنا عمر رضی اللہ عنہ نے طائف کے رہنے والے دو آدمیوں سے (جو مسجد نبوی میں اونچی آواز سے باتیں کر رہے تھے) فرمایا: اگر تم مدینے کے رہنے والے ہوتے تو میں تمھیں ضرور سزا دیتا کہ تم رسول اللہ( صلی اللہ علیہ وسلم ) کی مسجد میں اپنی آوازیں اونچی کرتے ہو۔[4]

[1] سنن أبي داود، الصلاۃ، حدیث: 466، وسندہ صحیح [2] صحیح مسلم، صلاۃ المسافرین، حدیث: 713۔ [3] سنن أبي داود، الصلاۃ، حدیث: 465، وجامع الترمذي، الصلاۃ، حدیث: 314، وسنن ابن ماجہ، المساجد والجماعات، حدیث: 773-771۔ [4] صحیح البخاري، الصلاۃ، حدیث: 470۔