نبی کریم صلی اللہ علیہ وسلم بحیثیت معلم

(2) ہر مناسب جگہ میں تعلیم دینا ہمارے نبی کریم صلی اللہ علیہ وسلم نے سلسلہ تعلیم کو کسی خاص مقام یا جگہ میں محصور نہ کر رکھا تھا کہ اس کے علاوہ کسی اور مقام پر تعلیم نہ دیں، بلکہ جہاں بھی موقع میسر آتاآپ صلی اللہ علیہ وسلم تعلیم دیتے۔ ذیل میں اس بارے میں چند ایک شواہد توفیق الٰہی سے پیش کیے جا رہے ہیں : ۱۔مسجد میں تعلیم: امام بخاری رحمہ اللہ تعالیٰ نے حضرت عبداللہ بن عمر رضی اللہ عنہا سے روایت نقل کی ہے کہ: ’’أَنَّ رَجُلًا قَامَ فِي الْمَسْجِدِ، فَقَالَ :’’یَا رَسُوْلَ اللّٰہِ! مِنْ أَیْنَ تَأْمُرُنَا أنْ نُھِلَّ؟‘‘ فَقَالَ رَسُوْلُ اللّٰہِ صلی اللّٰه علیہ وسلم :’’ یُھِلُّ أَھْلُ الْمَدِیْنَۃِ مِنْ ذِي الْحُلَیْفَۃِ، وَیُھِلُّ أَھْلُ الشَّامِ مِنَ الْجُحْفَۃِ، وَیُھِلُّ أَھْلُ نَجْدٍ مِنْ قَرْنٍ۔‘‘[1] ’’ایک آدمی نے مسجد میں کھڑے ہو کر عرض کیا:’’ یا رسول اللہ صلی اللہ علیہ وسلم ! آپ ہمیں کس جگہ سے احرام باندھنے کا حکم دیتے ہیں ؟‘‘ رسول اللہ صلی اللہ علیہ وسلم نے فرمایا:’’ اہل مدینہ ذُوالحلیفہ سے احرام باندھیں، شام والے حجفہ سے اور نجد کے لوگ قرن سے۔‘‘ اس حدیث شریف سے یہ بات واضح ہے کہ آپ صلی اللہ علیہ وسلم نے مسجد میں تعلیم دی۔ امام بخاری رحمہ اللہ تعالیٰ نے اس حدیث پر بایں الفاظ عنوان قائم کیا ہے: [بَابُ ذِکْرِ الْعِلْمِ وَالْفُتیَا فِي الْمَسْجِدِ] [2]

[1] صحیح البخاري، کتاب العلم،رقم الحدیث۱۳۳،۱/ ۲۳۰۔ [2] المرجع السابق۱؍۲۳۰