نبی کریم صلی اللہ علیہ وسلم بحیثیت معلم

’’قَالَ رَسُولُ اللّٰہِ صلی اللّٰه علیہ وسلم :’’ اَلْمَاھِرُ بِالْقُرْآنِ مَعَ السَّفَرَۃِ الْکِرَامِ الْبَرَرَۃِ، وَالَّذِيْ یَقْرَأُ الْقُرْآنَ وَیَتَتَعْتَعُ فِیْہِ، وَھُوَ عَلَیْہِ شَاقٌّ، لَہُ أَجْرَانِ ‘‘۔[1] ’’ قرآن کا ماہر پیغام رساں معزز نیکو کار فرشتوں کے ساتھ ہوگا اور جو شخص قرآن پڑھتا ہے اور[ اپنے کمزور حافظہ کی بنا پر ]اس میں اٹکتا ہے اور اس پر پڑھنا گراں ہے، اس کے لیے دوہرا اجر ہے۔‘‘ بلاشبہ اسلام میں قرآن کریم کو خوب پختگی سے حفظ کرنے، اور عمدگی سے تلاوت کرنے کی شان و عظمت اور قدر و منزلت بہت زیادہ ہے، لیکن اگر کسی شخص میں ایسا کرنے کی استطاعت ہی نہ ہو، تو کیا وہ تلاوت قرآنِ کریم ترک کردے؟ رب کعبہ کی قسم! ہرگز نہیں۔ ہمارے نبی رحمت صلی اللہ علیہ وسلم نے ایسے شخص کو اس بات کی ترغیب دی کہ وہ اپنی بساط اور ہمت کے بقدر تلاوت جاری رکھے اور اس کے لیے دگنا اجر و ثواب ہے۔ ملا علی قاری رحمہ اللہ تعالیٰ شرح حدیث میں رقم طراز ہیں : ’’ لَہٗ أَجْرَانِ ‘‘۔ ’’ أَيْ أَجْرٌ لِقِرَائَ تِہٖ، وَأَجْرٌ لِتَحَمُّلِ مشَقَّتِہٖ، وَھٰذَا تَحْرِیْضٌ عَلَی تَحْصِیْلِ الْقِرَائَۃِ ‘‘۔[2] ’’ یعنی ایک اجر اس کے پڑھنے کا، اور دوسرا اجر اس کے مشقت برداشت کرنے کا اور یہ قرأت جاری رکھنے کی ترغیب ہے۔‘‘ خلاصۂ کلام یہ ہے، کہ ہمارے نبی کریم صلی اللہ علیہ وسلم اپنے شاگردوں کو اس بات کی ترغیب دیتے کہ معلوماتِ ضروریہ کے بعد جس قدر، اور جس درجہ اور کیفیت سے تعلیم حاصل کرسکو، کرو۔ فَصَلَواتُ رَبِّيْ وَسَلَامُہٗ عَلَیْہِ۔

[1] صحیح مسلم، کتاب صلاۃ المسافرین وقصرھا، باب فضل الماہر بالقرآن والذي یتتعتع فیہ، رقم الحدیث ۲۴۴ (۷۹۸)، ۱ ؍ ۵۴۹ ـ ۵۵۰۔ [2] مرقاۃ المفاتیح ۴ ؍ ۶۱۸۔