نبی کریم صلی اللہ علیہ وسلم بحیثیت معلم

۲۔ اجازت طلب کرتے وقت جواب میں کوتاہی پر خفگی: امام بخاری اور امام مسلم رحمہما اللہ تعالیٰ نے حضرت جابر رضی اللہ عنہ سے روایت نقل کی ہے کہ وہ بیان کرتے ہیں : ’’ أَتَیْتُ النَّبِيَّ صلی اللّٰه علیہ وسلم فِي دَیْنٍ کَانَ عَلَی أَبِيْ، فَدَفَعْتُ الْبَابَ، فَقَالَ:’’ مَنْ ذَا؟‘‘۔ فَقُلْتُ:’’ أَنَا ‘‘۔ فَقَالَ:’’ أَنَا أَنَا ‘‘۔ کَأَنَّہٗ کَرِھَھَا۔[1] وَفِي رِوَایَۃِ أَبِي دَاودَ الطِّیَالِسِيِّ :’’ کَرِہَ ذٰلِکَ ‘‘ بِالْجَزْمِ۔ ‘‘[2] ’’ میں اپنے والد کے ذمہ ایک قرض کے سلسلے میں نبی صلی اللہ علیہ وسلم کی خدمت میں حاضر ہوا تو میں نے دروازہ کھٹکھٹایا۔ آپ صلی اللہ علیہ وسلم نے دریافت فرمایا:’’کون ہے؟ ‘‘ تو میں نے عرض کیا:’’ میں۔‘‘ [اس پر] آنحضرت صلی اللہ علیہ وسلم نے فرمایا:’’ میں میں ‘‘ گویا کہ آپ نے اس [جواب] کو ناپسند فرمایا۔‘‘ اور امام ابو داود الطیالسی رحمہ اللہ تعالیٰ کی روایت میں ہے: راوی نے بلاتردد یہ بات بیان کی کہ:’’ آپ صلی اللہ علیہ وسلم نے اس [جواب] کو ناپسند فرمایا۔‘‘ اس حدیث شریف کے مطابق آنحضرت صلی اللہ علیہ وسلم نے حضرت جابر رضی اللہ عنہ کے جواب ’’ میں ‘‘ کو پسند نہ فرمایا اور اپنے ارشاد [میں میں ] کے ساتھ اپنی خفگی کا اظہار فرمایا۔

[1] سورۃ متفق علیہ:صحیح البخاري، کتاب الاستئذان، باب:إذا قال:’’ من ذا؟ ‘‘ فَقال:’’ أنا ‘‘، رقم الحدیث ۶۲۵۰، ۱۱؍۳۵ ؛ وصحیح مسلم، کتاب الآداب، باب کراھۃ قول المستأذن ’’ أنا ‘‘، إذا قیل:’’ من ھذا؟ ‘‘، رقم الحدیث ۳۸(۲۱۵۵)، ۳؍ ۱۶۹۷۔الفاظ حدیث صحیح البخاری کے ہیں۔ [2] منقول از:فتح الباري ۱۱؍۳۵۔